وفاقي گهرو وزير راڻا ثناءُ الله چيو آهي ته عمران خان هر شهر ۾ ٽولا ٺاهيا، ڪنهن کي به بخش نه ڪيو ويندو، ملڪ ۾ سياست جي آڙ ۾ دهشتگردن ۽ شرپسند کي منظم ڪيو ويو دفاعي هنڌن، سياسي مخالفن جي گهرن تي حملو ڪرڻ سياسي ڪلچر ناهي، عمران خان سان قوم گڏ ناهي، 9 مئي تي ڪجهه هزار ماڻهو ئي نڪتا ، جيڪي عوام نه پر شرپسند هئا.
اسلام آباد ۾ پريس ڪانفرنس ڪندي وفاقي گهرو وزير راڻا ثناءُ الله چيو ته پيپلزپارٽيءَ سان سياسي طور اختلاف رهيو آهي پر هنن هڪٻئي جي گهرن تي ڪڏهن به حملا ناهن ڪيا.
هن چيو ته عمران خان سياسي ليڊر نه پر فتنو آهي، هيءَ سياسي پارٽي نه پر نفرت پکيڙيندڙ مائيڊ سيٽ آهي، عمران خان جو مقصد ملڪ ۾ افرا تفري ۽ وڳوڙ پکيڙڻ آهي.
راڻا ثناءُ الله چيو ته شهيدن جي يادگارن کي ساڙڻ ڪهڙي سياست آهي، ايمبولنسون، اسڪول ۽ ريڊيو پاڪستان کي ساڙيو ويو، مال پڙي کي ڦري پوءِ باهه ڏني وئي.
گهرو وزير چيو ته مئي تي آءِ سي ٽي ۾ ٻارهن هنڌن تي مظاهرا ٿيا، پنجاب ۾ 15 کان 18 هزار ماڻهو نڪتا، ڪي پي ۾ 19 کان 22 هزار ماڻهو هئا، 11 مئي تي اسلام آباد ۾ چئن هنڌن تي مظاهرا ٿيا، ڪي پي 39 هنڌن تي احتجاج ڪيو ويو، ڪو به عوامي ردعمل سامهون نه آيو اهي وڳوڙي هئا.
راڻا ثناءُ الله چيو ته هر هنڌ مخصوص غليط استعمال ڪيا ويا، هي چوي ٿو ته سموري قوم ساڻس گڏ آهي.
گهرو وزير چيو ته قوم لاءِ ڏک جي ڳالهه آهي ته ان شخص 60 ارب رپيا ڦريا، قومي خزاني کي 60 ارب رپين جو نقصان پهچيو، 458 ڪينال ايراضي القادر ٽرسٽ جي نالي تي رجسٽر ڪرائي.
راڻا ثناءُ الله چيو ته جڏهن ڏوهاري چيف جسٽس آڏو اچي ٿو ته هو کيس چوي ٿو ته اوهان کي ڏسي خوشي ٿي، عمران خان کي اهڙو رليف مليو جيڪو آئيني تاريخ ۾ ڪنهن کي به ناهي مليو، سرڪاري رهائشگاهه ۾ مهمان بڻائي رکيو يو.
راڻا ثناءُ الله چيو ته هائيڪورٽ ۾ جيڪو به هن گهريو اهو کيس مليو، جيڪي ڪيس داخل ناهن ٿيا، انهن ۾ به کيس ضمانت ملي آهي.
گهرو وزير چيو ته ملڪ ۾ سياست جي آڙ ۾ دهشتگردن ۽ شرپسند کي منظم ڪيو ويو، قوم کي ان فتني بابت خبر هجڻ گهرجي، قوم ووٽ جي طاقت سان ان کي مائنس ڪري.
راڻا ثناءُ الله چيو ته عمران خان هر شهر ۾ ٽولا ٺاهيا، حڪومت پوري طرح انهن جو محاسبو ڪندي.
گهرو وزير چيو ته سرڪاري عمارتن ۾ لڳل سي سي ٽي وي ڪئمرائن جي مدد سان سڃاڻپ ڪئي ويندي، شرپسندن کي انصاف جي ڪٽهڙي ۾ آندو ويندو.
