جماعت اسلامي ڪراچي جي امير حافظ نعيم الرحمان چيو آهي ته ڪراچي ۾ ڌانڌلي نه پر ڌانڌلو ٿيو آهي، چيف اليڪشن ڪمشنر مان انصاف جي اميد ناهي، سنڌ اسيمبلي ۾ ميئر لاءِ ٿيندڙ قانونسازي چئلينج ڪئي ويندي.
ڪراچي ۾ ميڊيا سان ڳالهائيندي حافظ نعيم الرحمان چيو ته بلاول ڀٽو زرداري ڪراچي تي وڏيرن جي قبضي ۽ ڌانڌلي جو جشن ملهائي رهيو آهي.
هن چيو ته ميٽرڪ جي ٻارڙن کان رقم وٺي ڪاپي ڪرائڻ تي بلاول ڀٽو زرداري جشن ملهائي رهيو آهي.
سندس چوڻ هو ته 15 سالن کان پيپلز پارٽي تعليم جو نظام بهتر نه ڪري سگهي آهي، هي ظلم کين پٿرن جي دور ۾ وٺي وڃڻ تي جشن ملهائي رهيا آهن.
حافظ نعيم الرحمان چيو ته بلاول ڀٽو زرداري ٻڌائي ته آدمشماري ۾ ڪيتري ڳڻپ ڪئي وئي آهي، جماعت اسلامي جون تحريڪ انصاف سان ڳالهيون اڳتي وڌي رهيون آهن.
هن چيو ته پي ڊي ايم کي پنهنجي ضمير موجب فيصلو ڪرڻ گهرجي، جنهن کي ڪراچي سان همدردي سان هوندي جماعت اسلامي جو ساٿ ڏيندو.
سندس چوڻ هو ته پ پ جا نمبر پورا نه آهن، بلاول ڀٽو زرداري انسانن کي خريد ڪرڻ لاءِ پڙي لڳائيندو، هو پرامن نموني ويڙهه ڪندا ۽ آئيني ۽ جمهوري طريقو اختيار ڪيو ويندو.
حافظ نعيم الرحمان چيو ته پ پ 15 سالن کان ڪي فور رٿا نه ٺاهي سگهي آهي، ڪراچي جا شهري پاڻي جي ڦڙي لاءِ تڙپي رهيا آهن.
