جي يو آءِ سنڌ جي جنرل سيڪريٽري راشد محمود سومري چيو آهي ته عمران خان پرڏيهي ايجنٽ آهي، حڪيم محمد سعيد، ڊاڪٽر اسرار احمد ۽ عبدالستار ايڌي جا خدشا درست ثابت ٿي چڪا آهن.
ڪراچي ۾ پريس ڪانفرنس ڪندي راشد محمود سومري چيو ته فرانس ۾ ڪو قرآن شريف جي بي حرمتي ڪندو آهي ته سڄي ملڪ ۾ احتجاج ٿيندو آهي پر ڪور ڪمانڊر هائوس ۾ مسجد کي باهه ڏيڻ تي خاموشي ڇو آهي؟
هن چيو ته ملڪ ۾ جيڪڏهن پنهنجي فوج نه هوندي ته ڇا امن لاءِ نيٽو جي فوج طلب ڪئي ويندي.
سندس چوڻ هو ته جيڪڏهن پاڪ فوج نه رهي ته عوام به نه رهندو، عمران خان جي وڳوڙن تي ڀارت ۾ جشن ملهايو پيو وڃي.
راشد محمود سومري چيو ته آرمي چيف کي ٻڌائڻ چاهين ٿا ته جي يو آءِ مڪمل طور پاڪ فوج سان گڏ بيٺل آهي.
هن چيو ته عمران خان ڀلي ڪنهن کي به قتل ڪري پر کيس ڪو به گرفتار نه ٿو ڪري سگهي.
سندس چوڻ هو ته اسلام آباد هائيڪورٽ حڪم ڏنو آهي ته عمران خان کي ڪنهن به ڪيس ۾ گرفتار نه ڪيو وڃي.
راشد محمود سومري چيو ته ملڪي تاريخ ۾ ڪو به اهڙو مثال ناهي جو رمانڊ دوران ڪنهن کي ضمانت ملي وڃي.
هن چيو ته سپريم ڪورٽ اڳيان ڌرڻي ۾ شرڪت لاءِ سڀاڻي صبح سوير قافلن جي رواني ٿيندي.
راشد محمود سومري چيو ته جيڪڏهن ڪنهن قانون جي ڀڃڪڙي ڪئي ته سندس جي يو آءِ يا پي ڊي ايم سان ڪو تعلق نه هوندو.
