وزيراعظم شهبازشريف، جناح هائوس تي حملو ڪندڙن کي 72 ڪلاڪن ۾ گرفتار ڪرڻ جو حڪم ڏنو آهي.
شهبازشريف نگران وڏي وزير محسن نقوي سان گڏ جناح هائوس جو دورو ڪري زخمي اهلڪارن جي عيادت ڪئي.
ان موقعي تي ميڊيا سان ڳالهائيندي شهبازشريف چيو ته دهشتگردي جي واقعن ۾ ملوث ماڻهن کي قانون موجب سزا ڏني وڃي، رٿابندي ڪندڙن خلاف به ڪارروائي ٿيندي، قانون لوهي هٿن سان انهن کي پنهنجي پڪڙ ۾ آڻيندو.
شهبازشريف چيو ته اهڙي قسم جو ڪم ڪو به پاڪستان سوچي به نه ٿو سگهي، عمران نيازي ۽ سندس ٽولو پاڪستان دشمنن کان گهٽ ناهي، جيڪو ڪم شرپسند 75 ورهين ۾ نه ڪري سگهيا، اهو پي ٽي آءِ جي شرپسند ڪيو، رٿابندي تحت سرڪاري ملڪيتن کي نقصان پهچايو ويو، شرپسندن خلاف دهشتگردي ٽوڙ عدالتن ۾ ڪيس هلايا وڃن.
وزيراعظم چيو ته سمورن شرپسندن کي بنا فرق گرفتار ڪيو وڃي، ايندڙ 72 ڪلاڪن ۾ سمورن جوابدارن ۽ حملو ڪندڙن کي سوگهو ڪيو وڃي.
