ڪراچي شهر جي مختلف علائقن ۾ فائرنگ جي واقعن ۾ ٻن عورتن سميت 5 ڄڻا مارجي ويا، پوليس واقعي واري هنڌن تان شاهديون گڏ ڪري جاچ شروع ڪري ڇڏي.
پوليس جو چوڻ آهي ته فائرنگ جا واقعا ملير، سرجاني ٽائون. ڊفينس فيز 6 ۽ بلديا ۾ پيش آيا.
پوليس موجب، ملير ۾ ٻڪرا پڙي ڀرسان شادي تقريب دوران فائرنگ ۾ ارسلان نالي نوجوان اجل جو شڪار ٿي ويو،
پوليس موجب، فائرنگ ڪندڙ جوابدار علي رضا کي پسٽل سميت گرفتار ڪيو ويو آهي.
گلشن سرجاني ۾ پيٽرول پمپ تي ڪار مٿان فائرنگ اڻڄاتل هٿياربندن فائرنگ ڪئي جنهن جي نتيجي ۾ 2 ڄڻا مارجي ويا.
پوليس جو چوڻ آهي ته مارجي ويلن جي سڃاڻپ نسيم ۽ بابر طور ٿي، سندس مڙهه عباسي شهيد اسپتال منتقل ڪيا ويا.
هوڏانهن ڊفينس فيز 6 خيابان هلال ۾ اتفاقي گولي ڇٽڻ سبب عورت حياتي وڃائي ويٺي.
پوليس موجب مارجي ويل عورت صفيه طور ٿي، سندس مڙهه جناح اسپتال منتقل ڪيو ويو آهي.
ٻئي پاسي بلديا گلشن غازي ڀرسان گهر اندر فائرنگ جو واقعو پيش آيو آهي جنهن جي نتيجي ۾ نورين بي بي نالي عورت مارجي وئي.
پوليس موجب، عورت کي ڏير قتل ڪرڻ کانپوءِ فرار ٿي ويو آهي.
