سنڌ جي مختلف شهرن ۾ پاڪ فوج جي حمايت ۾ ريليون ڪڍي پاڪ فوج جي حق ۾ نعريبازي ڪئي وئي آهي.
خيرپور ۾ الحسن بلڊرز جي سي اي او ۽ سماجي اڳواڻ عرض محمد جانوري طرفان پنهنجي هيڊ آفيس کان ماڊل ٽائون تائين پاڪ فوج جي حمايت ۾ ريلي ڪڍي وئي.
سانگهڙ ۾ شهري ڪميٽي ۽ سول سوسائٽي طرفان پاڪ فوج جي حق ۾ جمالي پمپ کان پريس ڪلب تائين ريلي ڪڍي پاڪ فوج زنده باد جا نعرا هنيا ويا.
ڳڙھي ياسين ۾ شهرين پاران 9 مئي جي واقعن خلاف ۽ پاڪ فوج جي حمايت ۾ سيد علي حيدر شاھه، نصر الله اوڍاڻو ۽ ٻين جي اڳواڻي ۾ مدن پور پاڙي نور مصطفيٰ چوڪ تائين ريلي ڪڍي پاڪ فوج جي حق ۾ نعريبازي ڪئي وئي.
اڳواڻن چيو ته هو پاڪ فوج خلاف واويلا ڪندڙن کي ٻڌائڻ چاهن ٿا ته قوم پاڪ فوج جا گڏ بيٺل آهي.
هنن چيو ته قومي ادارن تي حملو ڪندڙن خلاف ڪارروائي ڪئي وڃي.
سندن چوڻ هو ته سياسي يا غير سياسي قوتون جيڪي به پاڪ فوج ۽ ادارن کي ڪمزور ڪن ٿا هو ان عمل جي مذمت ڪن ٿا.
اڳواڻن چيو ته پاڪ فوج ملڪ ۽ عوام جي حفاظت لاءِ بيمثال قربانيون ڏنيون آهن.
