تحريڪ انصاف چيئرمين عمران خان جي گرفتاريءَ بعد جي ايڇ ڪيو راولپنڊي تي حملي ۾ ملوث 14 وڳوڙين جي سڃاڻپ ٿي وئي آهي، پنجاب حڪومت 9 مئي جي پرتشدد واقعن ۾ ملوث وڳوڙي عنصرن کي هر صورت ۾ گرفتار ڪرڻ جو اعلان ڪيو آهي، محسن نقوي جو چوڻ آهي ته صوبي ۾ ڪور ڪمانڊر هائوس سميت 23 عمارتن کي نقصان پهچايو ويو آهي، پوليس جي گاڏين سميت 108 گاڏين کي باهه ڏئي ساڙيو ويو، 9 مئي تي پنجاب ۾ دهشتگرديءَ جا ڇرڪائيندڙ واقعا ٿيا آهن، وڳوڙن ۾ ملوث جوابدارن کي ڪنهن به صورت ۾ بخش نه ڪيو ويندو.
پرتشدد ڪاررواين ۾ ملوث وڳوڙن جي سڃاڻپ ۽ گرفتارين جو سلسلو تيزي سان جاري آهي جڏهن ته ڪيترن ئي وڳوڙن جي سڃاڻپ ٿي وئي آهي.
ذريعن موجب، پرتشدد مظاهرن ۾ شامل چئن عورتن سميت 14 ماڻهن جي سڃاڻپ ٿي آهي.
سڃاڻپ ٿيل جوابدارن ۾ روالپنڊي واسي افشان ڪامران، فاطما احسان، شبانا فياض، زاهد علي شاهه گيلاني، خان ڪاشف خان، محمد عثمان قريشي، پيرزاده شهباز ناصر ۽ حماد خان شامل آهن.
اسلام آباد واسي ابوبڪر احمد، عابد ملڪ، جهانگير احمد مري واسي انصر جاويد، ڪراچي واسي عاصمه خورشيد ۽ چڪوال واسي منيزا احمد جي به سڃاڻپ ٿي آهي.
حڪومتي ۽ فوجي ملڪيتن کي نقصان پهچائيندڙ ۽ وڳوڙ ڪندڙن جو گهيرو تنگ ڪرڻ لاءِ قانون لاڳو ڪندڙ ڇاپا هڻندڙ ٽيمون جوابدارن جي گرفتاري لاءِ سرگرم آهن.
ٻئي طرف لاهور ۾ پريس ڪانفرنس ڪندي محسن نقوي چيو ته 9 مئي تي پنجاب ۾ دهشتگرديءَ جا ڇرڪائيندڙ واقعا ٿيا، سڄي صوبي ۾ وڳوڙن طرفان پوليس جي گاڏين سميت 108 گاڏين کي ساڙيو ويو.
سندس چوڻ هو ته 23 عمارتن کي نقصان پهچايو ويو، ميانوالي تي حملي جو پورو پلان ڪيو ويو هو، ماڻهو هٿيارن سان هئا ۽ پلان تحت جهازن کي ساڙيو ويو.
پنجاب جي نگران وڏي وزير محسن نقوي چيو ته جناح هائوس تي ڪنهن سياسي پارٽيءَ جو ڪارڪن حملو نٿو ڪري سگهي، جي ايڇ ڪيو سميت 23 عمارتن کي نقصان پهچايو ويو، مٿن ڀلي ڪهڙو به دٻاءُ اچي ته هو اصل جوابدارن کي گرفتار ڪندا.
هن چيو ته هو هاڻي قانون موجب هلندا، جاچ ٿي رهي آهي روزانو معلومات ۾ اضافو ٿي رهيو آهي.
پنجاب جي نگران وڏي وزير محسن نقوي چيو ته وڳوڙن ۾ ملوث ڪجهه ماڻهن کي گرفتار ڪيو ويو آهي باقي ٻين کي به جلد قانون جي پڪڙ ۾ آندو ويندو ڪنهن کي به بخش نه ڪيو ويندو.
