قومي اسيمبليءَ ۾ مخالف ڌر جي اڳواڻ راجا رياض، پي ٽي آءِ چيئرمين عمران خان کي فتنو ۽ ڏڦيڙ قرار ڏئي ڇڏيو، سندس چوڻ آهي ته تربيت حاصل ڪندڙ ماڻهن ڪور ڪمانڊر هائوس کي باهه ڏئي ساڙيو آهي، 9 مئي تي دشمنن ملڪي ساک کي نقصان پهچايو آهي، عمران خان جي فتني سموري قوم جو ڪنڌ جهڪائي ڇڏيو آهي.
قومي اسيمبليءَ جي اجلاس کي خطاب ڪندي راجا رياض چيو ته اهو جهاز جنهن کي ڀارت ڪيرائي نه سگهي ان کي ملڪ دشمنن ساڙي ڇڏيو، شهيدن جي يادگارن کي به بخش نه ڪيو ويو.
سندس چوڻ هو ته ميانوالي ۾ اربين ڊالر جا اثاثا آهن، جهازن کي ساڙڻ جي ڪوشش ڪئي وئي، عمران خان جي گرفتاري بعد تربيت حاصل ڪندڙ ماڻهو افغانستان مان آيل آهن.
قومي اسيمبليءَ ۾ مخالف ڌر جي اڳواڻ راجا رياض چيو ته تربيت حاصل ڪندڙ ماڻهن ڪور ڪمانڊر هائوس کي باهه ڏئي ساڙيو آهي، 9 مئي تي دشمنن ملڪي ساک کي نقصان پهچايو آهي، عمران خان جي فتني سموري قوم جو ڪنڌ جهڪائي ڇڏيو آهي.
هن چيو ته عمران خان هڪ فتنو ۽ ڏڦيڙ آهي، سندس گرفتاري بعد اهو ڪجهه ڪيو ويو جيڪو دشمن ناهن ڪري سگهيا.
سندس چوڻ هو ته عمران خان پاڪ فوج خلاف سازش ڪئي کيس ڦاهي ڏيڻ گهرجي، جهڙي طرح ناٺي کي ڀليڪار ڪيو ويندو آهي هنن اهڙي طرح ڪيو، هڪ يهودي کي ويلڪم ڪرڻو آهي ته عدالتون ڇڏي ڏيو ۽ چونڊ وڙهو.
قومي اسيمبليءَ ۾ مخالف ڌر جي اڳواڻ راجا رياض چيو ته ڪڏهن ڪنهن کي رمانڊ ۾ به ضمانت ملي آهي؟، سپريم ڪورٽ عمران خان کي گيسٽ هائوس اماڻيو پر اتي به فون ڪري چيو ته هي سندن مهمان آهي.
راجا رياض چيو ته فوج سان ٻڌي جي اظهار طور ايوان ۾ ڏهه منٽن جي خاموشي ڪئي وڃي ۽ رڳو ترانو وڄايو وڃي ته جيئن سندن دلين ۾ محب الوطني پيدا ٿئي.
قومي اسيمبلي اجلاس کي خطاب ڪندي ايم ڪيو ايم ايم اين اي صلاح الدين چيو ته فتنو هول سيل ۾ ضمانتون وٺي رهيو آهي، سپريم ڪورٽ جو چيف جسٽس مدد ڪري رهيو آهي.
سندس چوڻ هو ته گذريل ڏينهن سندن گاڏي تي حملو ڪيو ويو جنهن ۾ صابر قائمخاني زخمي ٿي پيو، هو حملا ڪندڙن کي ٻڌائڻ چاهن ٿا ته جيڪڏهن اوهان اهي حرڪتون نه ڇڏيون ته ڪراچيءَ ۾ اوهان جو جيئڻ جنجال ڪيو ويندو.
ايم ڪيو ايم ايم اين اي صلاح الدين چيو ته اسپيڪر فوري طور نوٽيس وٺي ۽ حملو ڪندڙن خلاف ڪارروائي ڪري، 9 مئي تي فتني خان کي القادر ٽرسٽ ڪرپشن ڪيس ۾ گرفتار ڪيو ويو ڪڏهن ڪورٽ ۾ پنهنجي ڄنگهه ڏيکاريندو آهي ته ڪڏهن دٻو پائي اچي ويندو هو.
