قومي اسيمبلي ۾ اتحادي پارٽين سپريم ڪورٽ جي چيف جسٽس طرفان قاعدن ۽ ضابطن جي ڀڃڪڙي جي جائزي لاءِ سموري ايوان تي ٻڌل ڪميٽي جوڙڻ جو مطالبو ڪيو آهي، مخالف ڌر جي اڳواڻ، پي ٽي آءِ چيئرمين عمران خان خلاف آرمي ايڪٽ تحت ڪيس داخل ڪري کيس سرعام ڦاهي ڏيڻ جو مطالبو ڪيو، خواجه آصف جو چوڻ آهي ته آئيني اختيار استعمال ڪرڻ جو وقت اچي ويو آهي، پارليامينٽ چيف جسٽس جي مس ڪنڊڪٽ جو جائزو وٺي، عدليا جي هڪ جٿي آئين جي ڀڃڪڙي نه پر انهن جي پٺڀرائي ڪري رهي آهن، جن جناح هائوس تي حملو ڪيو.
قومي اسيمبلي جو اجلاس اسپيڪر راجا پرويز اشرف جي صدارت هيٺ ٿيو.
بچاءَ واري وزير خواجه آصف چيو ته عدليا جو هڪ حصو هڪ شخص کي رعايت ڏئي رهيو آهي، ان تي ايوان ۾ بحث ڪرايو وڃي.
هن چيو ته آئيني اختيار استعمال ڪرڻ جو وقت اچي ويو آهي، پارليامينٽ چيف جسٽس جي مس ڪنڊڪٽ جو جائزو وٺي.
خواجه آصف چيو ته عدليا جي هڪ جٿي آئين جي ڀڃڪڙي نه پر انهن جي پٺڀرائي ڪري رهي آهن، جن جناح هائوس تي حملو ڪيو.
مخالف ڌر جي اڳواڻ راجا رياض چيو ته عمران خان ملڪ ڏڦيڙ ۽ انارڪي پکيڙي رهيو آهي، فوجي توڙي سرڪاري ملڪيتن تي حملا ڪيا ويا، دل رت جا ڳوڙها روئي رهي آهي، عمران خان مٿان آرمي ايڪٽ تحت ڪيس داخل ڪري کيس سرعام ڦاهي ڏني وڃي.
سندس چوڻ هو ته عمران خان اهو ڪم ڪيو، جيڪو دشمن به ڪڏهن ناهي ڪيو.
اپوزيشن ليڊر اسپيڪر کان مطالبو ڪيو ته پاڪستان ۽ پاڪ فوج سان ٻڌيءَ لاءِ ڏهن منٽن لاءِ اجلاس ملتوي ڪيو وڃي.
ايم اين اي صلاح الدين چيو ته چيف جسٽس جي حڪم تي هڪ فتني کي ضمانت ڏني وئي، اهو ئي شخص اسلام آباد هائيڪورٽ مان هول سيل تي ضمانتون وٺي رهيو آهي، چيف جسٽس کي هڪ ڏوهاريءَ کي ڏسي خوشي ٿي.
قادر مندوخيل چيو ته چيف جسٽس کي ايوان ۾ طلب ڪيو وڃي ۽ توهين پارليامنيٽ جو بل جلد منظور ڪيو وڃي، تحريڪ انصاف جي ڪارڪنن ملڪ کي وڏو نقصان پهچايو آهي.
خالد حسين مگسي چيو ته رڳو ڳالهيون ٿي رهيون آهن، ڪو به ايڪشن نه پيو ٿئي، اهڙي قسم جي کليل ڇوٽ سمجهه کان ٻاهر آهي.
