وفاقي وزير خورشيد شاهه چيو آهي ته پاڪستان مان غيرقانوني طريقي سان برطانيا ويندڙ رقم کي پاڪستان آڻڻ لاءِ ڊيل ٿي هئي، رقم سپريم ڪورٽ ۾ جمع ٿيڻ بدران القادر ٽرسٽ ۾ جمع ٿي، جنهن مان جهلم ۾ ساڍا چار سئو ڪينال زمين ورتي وئي.
جاري ڪيل بيان ۾ خورشيد شاهه جو چوڻ هو ته جهلم واري زمين پهريان زلفي بخاري ۽ پوءِ عمران خان ۽ سندس گهر واري جي نالي تي منتقل ٿي.
هن چيو ته سپريم ڪورٽ جي چيف جسٽس کي القادر ٽرسٽ ڪرپشن بابت خبر هئي، ڇا جج به ڪڏهن ڪنهن جوابدار کي ڀليڪار ڪيو آهي، پارليامينٽ کان مطالبو ڪندس ته عمر عطا بنديال خلاف ريفرنس داخل ڪيو وڃي.
وفاقي وزير جو چوڻ هو ته فوج کي سوچڻو پوندو ته جيڪڏهن ملڪيتن تي حملن ۾ ملوث جوابدارن کي ڇڏيو ويو ته پوءِ اڳتي هلي اڃا وڌيڪ نقصان ٿيندو.
هن چيو ته پاڪستان ۾ فوجي ٿاڪن مٿان ٿيل حملي بعد ڀارت ۽ اسرائيل ۾ خوشي آهي.
