ايم اين اي محمود مولوي تحريڪ انصاف ڇڏڻ جو اعلان ڪري ڇڏيو، سندس چوڻ آهي ته پي ٽي آءِ جيڪو ڪم ڪيو اهو ڀارت جا وڏا به نه ٿا ڪري سگهن، عمران خان جي گرفتاريءَ تي پاڪ فوج جي مخالفت جو ڪو به جواز ناهي، سياسي پارٽيون تبديل ڪري سگهجن ٿيون پر پنهنجي فوج کي تبديل نه ٿو ڪري سگهجي.
ڪراچي ۾ پريس ڪانفرنس ڪندي محمود مولوي چيو ته کيس ٽڪيٽ عمران خان ڏني ۽ پارٽي عزت ڏني، هو پنهنجي فوج خلاف ڪڏهن نه ويو آهي ۽ نه وري ويندو، سياسي پارٽي ڇڏي سگهن ٿا پر فوج تبديل نه ٿي ڪري سگهجي.
هن چيو ته کيس 65 ۽ 71 جي جنگ چڱي نموني ياد آهي، جيڪو ڀارت جو پيءَ به نه ٿو ڪري سگهي اهو پي ٽي آءِ ڪري ڇڏيو آهي.
سندس چوڻ هو ته فوج کي هٽائي ملڪ نه ٿو هلي سگهي، پي ٽي آءِ ۾ شموليت وقت سلجهيل پارٽي آهي جيڪو واقعو هن ڏٺو تنهن تي کيس ڏک ٿيو آهي.
محمود مولوي چيو ته فوج سان جنگ ڪٿي جائز ناهي، فوج مٿان اهڙيون سوين شيون قربان آهن، جنهن جهاز تي فخر ڪيو ويندو هو تنهن جي ئي برحمتي ڪئي وئي.
هن چيو ته هو ڪنهن به نئين پارٽي ۾ شامل نه ٿي رهيو آهي، هو ڪو ادارو ياد پارٽي ٺاهيندو جنهن ۾ اهڙن ماڻهن کي شامل ڪيو ويندو جيڪي ملڪ کي اڳتي وڌائڻ چاهين ٿا.
سندس چوڻ هو ته گهڻي قدر پارٽيون حڪومت دور فوج جي تعريف ڪنديون آهن ۽ پوءِ وري تنقيد ڪئي ويندي آهي.
محمود مولوي چيو ته اسيمبلي ۾ عوام جي ڳالهه ڪيو ۽ مسئلن تي ڳالهايو وڃي، اهڙو ڪم نه ڪيو جيڪو شفاف نه هجي، الله کيس جيڪو ڏنو آهي اهو ملڪ مان ئي مليو آهي.
هن چيو ته ڪو هڪ ماڻهو چوي هن ڪنهن جي رقم کاڌي آهي، هو دنيا مان وڃڻ کان اڳ عزت ۽ وقار سان وڃڻ جو خواهشمند آهي، هن ڪئنڊين شهريت وٺڻ کان انڪار ڪيو.
سندس چوڻ هو ته عمران خان چوندو هو ته فوج سندن ڪرنگهي جي هڏي آهي، فوج سان وڙهي هو ڇا ثابت ڪندا، ڪو سندس سافٽ ويئر تبديل نه ٿو ڪري سگهي.
محمود مولوي چيو ته 9 مئي جي وڳوڙن ۾ ملوث پي ٽي آءِ جي ماڻهن کي سزا ملڻ گهرجي، جيڪو ٻارڙن کي ڀڙڪائي رهيو آهي تنهن کي به سزا ڏني وڃي.
