سڌ سماءَ واري وفاقي وزير مريم اورنگزيب چيو آهي ته 9 مئي واقعن جي سموري رٿا بندي زمان پارڪ ۾ ڪئي وئي آهي، چيف جسٽس گوڊ ٽو سي يو چئي عمران خان جي پٺڀرائي ڪئي، صدر جيڪو پي ٽي آءِ لاءِ ڪري رهيو آهي تنهن تي کين ڪاوڙ آهي.
اسلام آباد ۾ پريس ڪانفرنس ڪندي مريم اورنگزيب چيو ته عمران خان وضاحتون ڏئي رهيو آهي ته 9 مئي تي جيڪو ڪجهه ٿيو ايجنسين ڪيو آهي، ڇا ٽڪيٽ هولڊر ۽ ٽائيگر فورس ايجنسي جا ماڻهو آهن، چيو ويو ته ٻيهر گرفتار ڪيو ويو ته 9 مئي کان وڌيڪ رد عمل ايندو، ڇا توهان جي ڳالهه سڀ مڃي ويندا.
هن چيو ته تحريڪ انصاف چيئرمين عمران خان جي سموري سياست ڏڦيڙ، وڳوڙ ۽ ملڪ دشمني آهي، جيڪڏهن پي ٽي آءِ کي پي ٽي وي ڪيس ۾ سزا ڏني وڃي ها ته اهڙا واقعا نه ٿين ها.
سندس چوڻ هو ته سڀني ڪجهه عمران خان نه ڪرايو آهي ته عدالت ۾ پيش ڇو نه ٿيو آهي، عمران خان جي سموري سياست تشدد ۽ ڏڦيڙ جي چوڌاري گهمي ٿي، شاهراهه دستور تي سياسي عمل سڀني ڏٺو آهي، سانحي تي سڀني جي اکين ۾ ڳوڙها آهن.
مريم اورنگزيب چيو ته عمران خان فارين فنڊڊ ايجنٽ ۽ فتنو آهي، جناح هائوس ۽ شهيدن جي يادگار کي باهه ڏني وئي، سڀني ڪجهه ڪرڻ کانپوءِ چوي ٿو ته هن نه ڪيو آهي، جڏهن ته پي ٽي آءِ جي آفيشل اڪائونٽ تان هدايتون جاري ڪيون ويون آهن، ڇا توهان عوام کي بيوقوف سمجهو ٿا، فتني، فساد ۽ سازش کي ختم ٿيڻ گهرجي.
هن چيو ته حڪومت مهانگائي جي صورتحال ۾ عوام کي رليف ڏئي رهي آهي، ڏکين حالتن باوجود پئٽروليم شين جا اگهه گهٽ ٿيا آهن.
مريم اورنگزيب چيو ته پئٽروليم شين جي اگهن ۾ گهٽتائي ڏکين حالتن ۾ ننڍڙو رليف آهي، ماضي ۾ آءِ ايم ايف سان معاهدو معطل ڪيو ويو.
