ناليواري اديب ۽ محقق گل حسن ڪلمتي جي ملير ۾ مڙهه مٽي ماءُ حوالي ڪيو ويو.
فجر جي وقت گل حسن ڪلمتي ڳچ عرصو ڪينسر جي مرض ۾ مبتلا رهڻ بعد ڊائو اسپتال ۾ علاج دوران دم ڌڻي حوالي ڪيو هو.
گل حسن ڪلمتي جي جنازي نماز گڏاپ جي ملان عرضي بلوچ ڳوٺ ۾ ادا ڪئي وئي.
جنازي نماز ۾ ايم اين اي عبدالحڪيم بلوچ، ايم پي اي سليم بلوچ، پ پ ملير جو صدر سلمان عبدالله مراد، نور حسن جوکيو، اياز امير بلوچ، مير عباس ٽالپر، سليم ميمڻ، قادر بلوچ، انور بلوچ، الاهي بخش بڪڪ، لال جروار، خدا ڏنو شاهه، ماما غني بلوچ، رياض بلوچ ۽ اصغر باغي، سياسي سماجي اڳواڻن، اديبن، شاعرن، وارثن توڙي شهرين وڏي انگ ۾ شرڪت ڪئي.
جنازي نماز ادا ڪرڻ بعد گل حسن ڪملتي جو اباڻي قبرستان ۾ مڙهه مٽي ماءُ حوالي ڪيو ويو.
گل حسن ڪلمتي جي وڇوڙي جي خبر پوندي ئي سڄي سنڌ سوڳوار بڻجي وئي.
گل حسن ڪلمتي سنڌ جي تاريخ تي وڏو ڪم ڪيو.
هن سنڌي، اردو ۽ انگريزي ۾ ڪيترائي ڪتاب به لکيا.
سنڌ جي وڏي وزير مراد علي شاهه، صوبائي وزير شرجيل انعام ميمڻ ۽ ٻين گل حسن ڪلمتي جي لاڏاڻي تي ڏک جو اظهار ڪيو آهي.
سنڌ جي وڏي وزير سيد مراد علي شاهه طرفان مشهور تاريخدان گل حسن ڪلمتي جي لاڏاڻي تي گهري ڏک جو اظهار ڪندي چيو ته گل حسن کي ڪراچي جي تاريخ، شخصيتن، ڍنڍن نالن، قبيلن، قبرستانن ۽ پکين تي مهارت حاصل هئي.
وڏي وزير مراد علي شاهه جو چوڻ هو ته مرحوم هڪ پرخلوص ۽ سادي شخصيت جو مالڪ هو.
صوبائي وزير شرجيل ميمڻ چيو آهي ته گل حسن ڪلمتي جي وڇوڙي سان سنڌ علم ۽ ادب جي دنيا جي محقق کان محروم ٿي وئي آهي.
شرجيل انعام ميمڻ چيو ته علمي، ادبي ۽ تحقيقي ميدان ۾ گل حسن ڪلمتي خدمتون سرانجام ڏنيون.
