نيب راولپنڊي تحريڪ انصاف جي چيئرمين عمران خان ۽ سندس گهرواري بشريٰ بي بي کي القادر ٽرسٽ ڪرپشن ڪيس ۾ طلب ڪري ورتو.
نيب جو چوڻ آهي ته القادر ٽرسٽ يونيورسٽي ڪيس ۾ عمران خان کي ساڍي ڏهين وڳي ۽ سندس گهرواري بشريٰ بي بي کي 12 وڳي جاچ ٽيم آڏو پيش ٿيڻ جا نوٽيس جاري ڪيا.
نيب موجب، ڪمائنڊ انويسٽيگيشن ٽيم عمران خان ۽ سندس گهرواري کان جاچ ڪندي جڏهن ته عمران خان کان 19 ڪروڙ پائونڊز جي غيرقانوني منتقلي بابت 20 سوالن جا جواب به طلب ڪيا آهن.
نيب جو چوڻ آهي ته عمران خان برطانيه مان 19 ڪروڙ پائونڊز آڻي واپس جوابدارن کي ڏئي مالي فائد ورتا، رياست پاڪستان جا 19 ڪروڙ پائونڊز جوابدارن کي واپس ڪري عمران خان 458 ڪنال زمين ۽ 28 ڪروڙ رپيا حاصل ڪيا.
نيب موجب، جوابدارن کي 19 ڪروڙ پائونڊ واپس ڪري عمران خان ۽ بشريٰ بي بي جي ٽرسٽ عطئي جي مد ۾ وڏي رقم ورتي، عمران خان 2 مارچ تي ڪال اپ نوٽيس ۾ پيش ٿيو نه ئي جواب ڏنو.
نيب جو چوڻ آهي ته عمران خان ڄاڻي واڻي انڪوائري کان فرار ٿيڻ جو رستو اختيار ڪري رهيو آهي، نيب عمران خان کان برطانوي ايجنسي سان رابطن جو رڪارڊ به طلب ڪيو آهي، عمران خان جاچ ۾ شامل نه ٿيو ته سنگين نتيجا نڪرندا.
هوڏانهن ذريعن موجب، وڪيلن عمران خان کي ذاتي حيثيت ۾ نيب آڏو پيش نه ٿيڻ جو مشورو ڏنو ويو آهي.
ذريعن موجب، عمران خان کي وڪيلن ذريعي نيب جي 20 سوالن تي ٻڌل جواب ۽ دستاويز فراهم ڪرڻ جو مشورو ڏنو ويو آهي.
