سنڌ سرڪار 9 مئي سانحي دوران ساڙيل موٽرسائيڪل جي مالڪن کي معاوضو ڏيڻ جو اعلان ڪري ڇڏيو، شرجيل ميمڻ جو چوڻ آهي ته 9 مئي تي بدمعاشي ڪري عوام کي تڪليف پهچائڻ جي ڪوشش ڪئي وئي، سنڌ ۾ نقصان جو ازالو صوبائي حڪومت ڪندي، سمورين وڳوڙي ڪاررواين ۾ تحريڪ انصاف قيادت ملوث آهي، دهشتگرديءَ جي مخالفت ڪندڙ ماڻهو تحريڪ انصاف ڇڏي رهيا آهن.
ڪراچيءَ ۾ پريس ڪانفرنس ڪندي شرجيل انعام ميمڻ چيو ته مڪاني ادارن جي چونڊن جي شيڊول ۾ دير ٿي رهي آهي جنهن سبب عوام ۾ بيچيني آهي، اڃا تائين اهي ماڻهو ويٺل آهن، اليڪشن ڪميشن فوري طور شيڊول جاري ڪري.
سندس چوڻ هو ته 9 مئي تي ٻڌايو ويو ته جيڪڏهن سندن ليڊر کي ڪجهه ٿيو ته نقصان پهچايو ويندو، هاڻي ڪجهه ماڻهو بيان تبديل ۽ ڪجهه پارٽي ڇڏي رهيا آهن.
صوبائي وزير شرجيل انعام ميمڻ چيو ته جهڙي طرح ماڻهن کي پي ٽي آءِ ۾ آندو ويو هو اهڙي طرح پارٽي کي ڇڏي رهيا آهن، جن حملا ڪيا هئا ان ۾ پي ٽي آءِ جا اڳواڻ سندن پٺيان هئا.
هن چيو ته هو وڊيو ۾ ڏيکاريندا ته ڪهڙا ڪهڙا اڳواڻ حملن ۾ موجود هئا، ملڪيتن کي نقصان پهچايو ويو جن جي موٽرسائيڪل ساڙي وئي آهي حڪومت ان کي موٽرسائيڪل وٺي ڏيندي ان جا سمورا پيسا وڳوڙين ۾ ملوث جوابدارن کان ڀرايا ويندا.
سندس چوڻ هو ته اهي سمورا ايم اين ايز ۽ ايم پي ايز هئا، جيڪي ڪراچي ۾ 9 مئي جي دهشتگردي ۾ ملوث هئا، ان جو حساب ڪير ڏيندو، پوليس وارن تي تشدد ڪيو ويو هاڻي اهي روڊن تي ڇو نه اچي رهيا آهن.
سنڌ جي اطلاعات کاتي واري وزير شرجيل انعام ميمڻ چيو ته جهڙي طرح ملڪيتن کي نقصان پهچايو ويو، ٽرانسپورٽ ۽ بسن کي نقصان پهچايو ويو جيڪو نقصان پهتو اهو غريبن کي پهتو، جهڙي طرح دهشتگردي ڪئي وئي جنهن نقصان پهچايو کين بخش نه ڪيو ويندو.
سندس چوڻ هو ته ڪابه سياسي پارٽي ائين ناهي ڪندي، اهڙي طريقي جي سياست سان ڪجهه نه ٿيندو، پارٽي جا ماڻهو جيلن ۾ آهن، عمران خان پاڻ ٻاهر ۽ سندس اولاد پرڏيهه ۾ آهي.
صوبائي وزير شرجيل انعام ميمڻ چيو ته عمران خان اقتدار لاءِ ماڻهن کي استعمال ڪري رهيو آهي، سندس خلاف ڪرپشن جا سنگين ڪيس آهن، عدالتن ۾ ضمانتن جي آچر بازار لڳل آهي، هڪ ملڪ ۾ هڪ قانون هئڻ گهرجي، پارليامينٽ جي حق تي ڌاڙي جو ڪنهن کي به حق ناهي، ملڪ وڏا نقصان برداشت ڪري چڪو آهي وڌيڪ نقصان نه پهچايو وڃي.
