پي ڊي ايم سربراهه مولانا فضل الرحمان چيو آهي ته ملڪي حالتن ۾ پرڏيهي مداخلت برداشت نه ٿي ڪري سگهجي، عمران خان کي پرڏيهي ايجنڊا پوري ڪرڻ لاءِ سياست ۾ آندو ويو، ڪانگريس جي 60 ميمبرن جي خط مان واضح ٿي ويو ته نيازي ڪنهن جي ايجنڊا تي آهي.
اسلام آباد ۾ ميڊيا سان ڳالهائيندي مولانا فضل الرحمان چيوته مذهب سندن ڪارڊ نه پر ڪاز آهي،
هن چيوته آمريڪي ڪانگريس جي 60 ميمبرن آمريڪي پرڏيهي وزير کي خط لکي چيو ته عمران خان کي تحفظ فراهم ڪيو وڃي، خط مان ثابت ٿي ويو ته عمران خان جي ايجنڊا ڪهڙي آهي، ملڪي حالتن ۾ پرڏيهي مداخلت برداشت نه ٿي ڪري سگهجي.
مولانا فضل الرحمان چيو ته عوام کي صبر جو امتحان نه ورتو وڃي، عمران خان جي محبت ۾ پريشان ٿيندڙ ملڪ جي مستقبل جو به سوچن.
پي ڊي ايم سربراهه چيو ته 9 مئي تي سموري قوم ڏٺو ته پي ٽي آءِ جي شرپسندن ڇا ڪيو، عمران خان کي رعايت ڏيڻ لاءِ آئين ۽ قانون سان مذاق ڪئي وئي.
مولانا فضل الرحمان چيو ته 9 مئي جا واقعا بيان ڪرڻ جهڙا ناهن، حب الوطني جي جذبي سان صورتحال جومقابلو ڪندا.
