پنجاب حڪومت ۽ پاڪستان تحريڪ انصاف جي چيئرمين عمران خان وچ ۾ 9 مئي جي واقعن ۾ ملوث جوابدارن جي گرفتاري بابت ڳالهيون اڄ ٿينديون.
ذريعن جو چوڻ آهي ته ڪمشنر لاهور جي سربراهي ۾ حڪومتي ٽيم اڄ ٻئين وڳي پي ٽي آءِ چيئرمين زمان پارڪ جي گهر پهچندي، جتي هو گهر ۾ سرچ آپريشن بابت عمران خان جي نمائندن سان ڳالهيون ڪندي.
سرچ آپريشن تي اتفاق ٿيڻ جي صورت ۾ 400 پوليس اهلڪار زمان پارڪ ۾ سرچ آپريشن جو حصو هوندا.
ٻئي طرف پنجاب جي نگران اطلاعات واري وزير عامر مير جو چوڻ آهي ته ڪمشنر لاهور جي سربراهي ۾ وفد پي ٽي آءِ چيئرمين جي رهائشگاهه زمان پارڪ ۾ ويندو ۽ ٽي وي ڪيمرائن جي موجودگي ۾ گهر جي تلاشي ورتي ويندي.
واضح رهي ته نگران سڌ سماءَ واري وزير دعويٰ ڪئي آهي ته عمران خان جي رهائشگاهه تي 9 مئي سانحي ۾ ملوث 40 مبينا شرپسند موجود آهن.
ان کان علاوه پنجاب پوليس عمران خان جي رهائشگاهه زمان پارڪ جي وڌيڪ 3 ڏينهن تائين سخت نگراني ڪرڻ جو فيصلو ڪيو آهي.
