بچاءَ واري وزير خواجا آصف چيو آهي ته سياسي اختلاف ضرور آهن پر ان جو مطلب اهو ناهي ته سرڪاري ۽ عوامي ملڪيتن تي حملا ڪيا وڃن، 9 مئي تي راولپنڊي، ميانوالي ۽ لاهور ۾ پي ٽي آءِ جي هٿياربند جٿن فوجي ٿاڪن تي حملا ڪيا، ملڪ ۾ ان کان اڳ به گرفتاريون ٿينديون رهيون آهن، سول ۽ فوجي ٿاڪن تي حملا ڪندڙ ملڪ دشمن آهن، پي ٽي آءِ جي وڳوڙين سوچيل سمجهيل منصوبي تحت حملا ڪيا اهڙو عمل ملڪ خلاف جنگ جي برابر آهي، جن ماڻهن حملا ڪيا انهن جو ٽرائل ملٽري ڪورٽن ۾ ٿيندو.
عالمي خابرو اداري کي انٽرويو ڏيندي خواجا آصف چيو ته ملڪ ۾ ان کان اڳ به گرفتاريون ٿينديون رهيون آهن، هو به گرفتار ٿيو هو، سندس ليڊر ۽ سياسي پارٽي جا ڪيترائي ماڻهو گرفتار ٿيا پر ڪڏهن تشدد جي سياست نه ڪئي.
سندس چوڻ هو ته هنن گرفتارين تي ڪڏهن سول ۽ فوجي ٿاڪن تي حملا نه ڪيا، سول ۽ فوجي ٿاڪن تي حملا ڪندڙ ملڪ دشمن آهن.
بچاءَ واري وزير خواجا آصف چيو ته پي ٽي آءِ جي وڳوڙين سوچيل سمجهيل منصوبي تحت فوجي ٿاڪن سميت عوامي ۽ سرڪاري ملڪيتن تي حملا ڪيا اهڙو عمل ملڪ خلاف جنگ جي برابر آهي.
هن چيو ته جن ماڻهن فوجي ٿاڪن، ملٽري بيسز ۽ فوجي شخصيتن جي رهائشگاهن تي حملا ڪيا انهن جو ٽرائل آئين ۾ ڏنل طريقي موجب ملٽري ڪورٽن ۾ ٿيندو.
سندس چوڻ هو ته هو نيون عدالتون ۽ نوان قانون نه ٺاهي رهيا آهن، پهريان کان قانون موجود آهن، اهڙن جوابدارن وٽ هائيڪورٽن ۽ سپريم ڪورٽ ۾ اپيل جو حق هوندو.
بچاءَ واري وزير خواجا آصف چيو ته ملڪ ۾ سياسي بحران ضرورت آهي پر تمام جلد ان تي ضابطو آندو ويندو، شهرن ۾ امن بحال ٿي چڪو آهي، ايندڙ ڪجهه ڏينهن ۾ حالتون معمول تي اچي وينديون، عام چونڊون آڪٽوبر ۾ پنهنجي وقت تي ٿينديون.
