خيرپور ۾ جي ڊبليو سي پاران پروفيسر ڊاڪٽر اجمل ساوند جي قاتلن جي گرفتاريءَ لاءِ احتجاجي ريلي ڪڍي ڌرڻو هنيو ويو.
جي ڊبليو سي جي سڏ تي شوڪت نوناري، ڊاڪٽر اجمل ساوند جي ڀاءُ ڊاڪٽر طارق ساوند، مختيار ملڪ، صنم راڄپر ۽ ٻين جي اڳواڻيءَ ۾ پريس ڪلب کان مريم توب تائين احتجاجي ريلي ڪڍي ڌرڻو هڻي نعريبازي ڪئي وئي.
ڌرڻي ۾ سياسي سماجي تنظيمن جي اڳواڻن، شاعرن، اديبن، صحافين، سول سوسائٽي ۽ ٻين وڏي انگ ۾ شرڪت ڪئي.
اڳواڻن ڌرڻي کي خطاب ڪندي چيو ته پروفيسر ڊاڪٽر اجمل ساوند جا قاتل گرفتار نه ٿيڻ ظلم جي انتها آهي.
هنن چيو ته ڪيترائي ڏينهن گذرڻ باوجود پوليس پروفيسر اجمل ساوند جا قاتل گرفتار ناهي ڪري سگهي جنهن سبب سنڌ جي شعور ۾ بيچيني واري لهر پکڙيل آهي.
سندن چوڻ هو ته پروفيسر اجمل ساوند جو قتل سنڌ جي شعور جو قتل آهي، سندس تعليمي ۽ تحقيقي خدمتون هميشه ياد رکيون وينديون.
احتجاج ڪندڙن اعليٰ اختيارين کان مطالبو ڪيو ته پروفيسر ڊاڪٽر اجمل ساوند جي قتل ۾ ملوث جوابدارن کي فوري طور قانون جي ڪٽهڙي ۾ آندو وڃي.
