وفاقي ڪابينا، 9 مئي واقعن ۾ ملوث شرپسندن خلاف قومي سلامتي ڪميٽي جي فيصلن تحت سخت ڪارروائي جي منظوري ڏئي ڇڏي.
وزيراعظم شهبازشريف جي صدارت هيٺ وفاقي ڪابينا جو اجلاس ٿيو، جنهن ۾ 9 مئي واقعن جي مذمت ڪئي وئي.
ڪابينا 9 مئي واقعن ۾ ملوث شرپسندن خلاف قومي سلامتي ڪميٽيءَ جي فيصلن تحت سخت ڪارروائي جي منظوري ڏني.
وفاقي ڪابينا ميمبرن شرپسندن خلاف زيرو ٽالرنس پاليسي اختيار ڪرڻ تي زور ڀريو.
ميمبرن راءِ ڏني ته فوجي ملڪيتن جو ٽرائل فوجي عدالتن ۽ سول ملڪيتن جو ٽرائل سول ڪورٽن ۾ هلايو وڃي، جن شهرن ۾ فوجي هنڌن تي حملا ٿيا، اتي فوجي عدالت اتي ئي قائم ڪيو وڃن.
ان کانسواءِ اجلاس دوران وزيراعظم شهباز شهريف ڪابينا کي ايران جي دوري بريفنگ ڏني، سندس چوڻ هو ته پاڪستان ايران سان مختلف شعبن ۾ سهڪار وڌائڻ جو خواهشمند آهي.
وزيراعظم چيو ته 900 ڪلوميٽر ڊگهي پاڪ ايران سرحد تي سڪيورٽي ۾ وڌيڪ بهتري آڻڻ تي اتفاق ڪيو ويو.
شهبازشريف چيو ته ايران کان گهٽ لاڳت واري بجلي گهرائڻ سان بلوچستان جي ڏورانهن علائقن ۾ ترقي ۽ خوشحالي ٿيندي.
هن چيو ته پئٽرول ۽ ڊيزل جي اگهن ۾ گهٽتائي جا اثر فوري طور عوام تائين پهچايا وڃن، ناجائز منافعي خورن خلاف سختيءَ سان ايڪشن ورتو وڃي.
وزيراعظم چيو ته روڊ ٽو مڪه رٿا سان پاڪستاني حج پانڌيئڙن کي بهترين سهولتون ملنديون.
وفاقي ڪابينا راولپنڊي ۾ انشورنس ٽربيونل قائم ڪرڻ جي به منظوري ڏني.
