لاهور هائيڪورٽ تحريڪ انصاف جي 123 ڪارڪنن جي نظربندي جو نوٽيفڪيشن معطل ڪندي کين فوري طور آزاد ڪرڻ جو حڪم ڏئي ڇڏيو.
لاهور هاءِ ڪورٽ جي جسٽس انوار الحق تحريڪ انصاف فرخ حبيب جي درخواست جي ٻڌڻي ڪئي.
فرخ حبيب جي وڪيل بئريسٽر احمد پنسوته دليل ڏيندي چيو ته 9 مئي جي واقعن بعد فيصل آباد مان ڪيترن ئي ماڻهن کي گرفتار ڪري نظربند ڪيو ويو، آءِ جي پنجاب گرفتاريءَ جو ميڊيا آڏو اعتراف ڪيو، گرفتاري ۽ نظربندي بنيادي حقن جي سنگين ڀڃڪڙي ۽ غيرقانوني آهي.
درخواست ڏيندڙ جي وڪيل اپيل ڪئي ته عدالت ڊپٽي ڪمشنر فيصل آباد جي نظربندي جي حڪمن کي ڪالعدم قرار ڏئي.
عدالت فيصل آباد مان تحريڪ انصاف جي اڳواڻن ۽ ڪارڪنن سميت 123 ڄڻن جي نظربندي جي حڪمن کي معطل ڪري ڇڏيو.
عدالت ڌرين کي نوٽيس جاري ڪندي جواب طلب ڪري ورتو.
واضح رهي ته فيصل آباد جي 123 پي ٽي آءِ ڪارڪنن جي نظربندي کي هائيڪورٽ ۾ چئلينج ڪيو ويو هو
