جماعت اسلامي جي امير سراج الحق چيو آهي ته حڪومت عوام کي هٿياربند ماڻهن جي رحم ڪرم تي ڇڏي ڏنو آهي، حڪومت عوام جي جان ۽ مال جي حفاظت ڪرڻ ۾ ناڪام ٿي وئي آهي، موجوده حالتن ۽ واقعن جو ذميوار ڪير آهي؟، هو بلوچستان کي ڪنهن به صورت ۾ اڪيلو نه ڇڏيندا، نالائق قيادت سبب بلوچستان بدامني جو شڪار آهي، صوبي ۾ لاشن ۽ دهشتگرديءَ جو ڪاروبار ڪيو پيو وڃي.
ڪوئيٽا ۾ پريس ڪانفرنس ڪندي سراج الحق چيو ته هو بلوچستان جي حقن لاءِ آواز اٿاريندا رهندا، صوبي جو مستقبل روشن آهي، 19مئي تي زوب ۾ جلسو هو ان موقعي تي مٿس آپگهاتي حملو ٿيو، الله جو شڪر آهي حملي کي ناڪام بڻايو ويو.
سندس چوڻ هو ته بلوچستان جا ماڻهو پاڻي لاءِ تڙپي رهيا آهن، هتي بدامني ۽ بيروزگاري آهي، مولانا هدايت الرحمان گوادر جي عوام جي حقن لاءِ ڌرڻو هنيو، سندس هاڻي به عزم آهي ته بلوچستان کي اڪيلو نه ڇڏيندا.
جماعت اسلامي جي امير سراج الحق چيو ته ملڪ جو سڀ کان وڏو ۽ قدرتي زخيرن سان مالا مال صوبو بارود جو ڍير بڻجي ويو آهي، بلوچستان جي مسئلن کان وفاقي ۽ صوبائي حڪومت اکيون بند ڪري ڇڏيون آهن.
سراج الحق چيو ته بلوچستان ۾ هڪ ڪلو ميٽر به موٽروي ناهي، ڏهن ورهين کان صوبي ۾ روڊن، سي پيڪ ۽ خوشحالي جا نعرا ٻڌي رهيا آهن، هتي اهڙو ڪجهه نظر نٿو اچي، بدامني ۽ ٽارگيٽ ڪلنگ آهي.
