راڻيپور ۾ پروفيسر ڊاڪٽر اجمل ساوند جي قاتلن جي گرفتاري لاءِ جي ڊبليو سي جي، پاران احتجاجي ريلي ڪڍي وئي.
جي ڊبليو سي جي، جي مرڪزي جنرل سيڪريٽري شوڪت نوناري، صوفي ياسين راڄپر، رويه ملاح، ڊاڪٽر نذير کوکر، امداد لاڙڪ، لياقت ميمڻ ۽ ٻين جي اڳواڻي ۾ ريلي ڪڍي وئي آهي.
احتجاجي ريلي ۾ سرداري نظام خلاف سخت نعريبازي پڻ ڪئي وئي.
ان موقعي تي اڳواڻن چيو ته پروفيسر ڊاڪٽر اجمل ساوند جو قتل سنڌ جي شعور جو قتل آهي، اجمل ساوند جهڙا ڏاها، صدين ۾ پيدا ٿيندا آهن.
هنن چيو ته سنڌ جي ٻَرندڙ مسئلن ۾ برادري جهيڙا به ناسور بڻجندا پيا وڃن، معمولي ڳالهين تان جهيڙا وڏن المين کي جنم ڏئي رهيا آهن.
اڳواڻن چيو ته سنڌ اڳئي ڏکين حالتن کي منھن ڏيندي پئي اچي، سرداري نظام سبب سنڌ ۾ قبيلائي جهيڙن ۾ ويتر وري اسان پاڻ ۾ وڙھي ھڪ ٻئي جا ڪونڌر پيا ڪهون.
سندن چوڻ هو ته پروفيسر اجمل ساوند جا قاتل گرفتار نه ٿيڻ پوليس جي ڪارڪردگي تي سواليه نشان آهي.
هنن مطالبو ڪيو ته بنا دير پروفيسر اجمل ساوند جا قاتل گرفتار ڪيا وڃن، سنڌ جي شعور جي قاتلن کي عبرتناڪ سزا ملڻ گهرجي.
