سنڌ جي اطلاعات واري وزير شرجيل انعام ميمڻ چيو آهي ته عمران خان اقتدار جي لالچ ۾ قوم کي گمراهه ڪري رهيو آهي، آمريڪا طرفان سازش جون ڳالهيون ڪندڙ هاڻي چوي ٿو ته ادارن ڪڍيو آهي، پي ٽي آءِ چيئرمين واحد وزيراعظم آهي جنهن کي قانوني نموني عوامي طاقت ذريعي نيڪالي ملي، عمران خان ۽ سندس وڳوڙي ساٿي ملڪي مفادن کي نقصان پهچائي رهيا آهن، ڪشمير معاملي تي ڪنهن به قسم جي سوديبازي نه ڪئي ويندي، مودي جي دور ۾ ڪشميرين تي بدترين ظلم ٿي رهيا آهن.
ڪراچيءَ ۾ پريس ڪانفرنس ڪندي شرجيل انعام ميمڻ چيو ته عمران خان ملڪ ۾ ڏڦيڙ پکيڙي رهيو آهي، عمران خان جي ماڻهن کي پاڻ ۾ ويڙهائڻ جي سازش ناڪام ٿيندي، عمران خان اقتدار جي حوس ۾ عوام کي ويڙهائڻ جي ڪوشش ڪري رهيو آهي.
سندس چوڻ هو ته عمران خان جي حڪومت ۾ ڪشمير ڪاز کي نقصان پهچايو ويو، عمران خان مودي جي سوڀ لاءِ نيڪ خواهشن جو اظهار ڪيو.
صوبائي وزير شرجيل انعام ميمڻ چيو ته عمران خان سائفر جي ڊرامي سان قوم کي ٽرڪ جي بتي پويان لڳائڻ جي ڪوشش ڪئي، عمران خان اقتدار جي لالچ ۾ قوم کي روز هڪ نئون دلاسو ڏيندو آهي، سياسي ماڻهن جا سياسي نظريا ڌار ٿي سگهن ٿا پر سياسي ماڻهو هڪ ٻئي جا دشمن ناهن ٿيندا.
هن چيو ته ڳالهين سياسي ۽ جمهوري طاقتن جي سڃاڻپ آهن، هو ڪنهن جي گرفتاريءَ تي خوش ناهن ٿيندا، عمران خان ٽي وي تي اچي پنهنجي سازشن جو اعتراف ڪري جنهن بعد کيس ٻڌي سگهجي ٿو.
سنڌ جي اطلاعات واري وزير شرجيل انعام ميمڻ چيو ته عمران خان پاڪستان جي ڪاز کي نقصان پهچائي رهيو آهي، عمران خان ۽ سندس ساٿي سرڪاري ادارن تي حملا ڪري رهيا آهن.
سندس چوڻ هو ته شهيد ذوالفقار علي ڀٽو ۽ شهيد راڻي محترمه بينظير ڀٽو به ڪشمير جو ڪيس وڙهيو، پرڏيهي وزير بلاول ڀٽو زرداري جو هر پرڏيهي دورو ڪامياب سفارتڪاري جو ثبوت آهي.
سنڌ جي اطلاعات واري وزير شرجيل انعام ميمڻ چيو ته پرڏيهي وزير جي بهترين سفارتڪاري سبب چين والاريل ڪشمير ۾ ڪوٺايل ڪانفرنس ۾ شرڪت کان انڪار ڪيو، بلاول ڀٽو زرداري ڪشمير جو دورو ڪري رهيو آهي، بلاول ڀٽو زرداري پاڪستان جو ڪيس هر جاءِ تي بهادري سان وڙهيو.
