مملڪتي وزير فيصل ڪريم ڪنڊي چيو آهي ته پرڏيهي وزير بلاول ڀٽو زرداري عالمي فورمن تي ڪشمير جو ڪيس ڀرپور نموني وڙهيو آهي، پاڪستان کي پرڏيهي محاذ تي وڏيون ڪاميابيون مليون آهن، چين ۽ افغانستان جي پرڏيهي وزيرن پاڪستان جا ڪامياب دورا ڪيا، عمران خان سفارتي محاذ تي ملڪ جي ساک متاثر ڪئي، پيپلز پارٽي هميشه حق جي ڳالهه ڪئي آهي، 9 مئي واقعن تي ماڻهو سوڳوار آهن، عمران خان کي آمريڪا کي منٿون ڪرڻ بدران پنهنجي ماڻهن سان ڳالهيون ڪرڻ گهرجن.
اسلام آباد ۾ پريس ڪانفرنس ڪندي فيصل ڪريم ڪنڊي چيو ته ڊجيٽل آدمشماري بابت پيپلز پارٽي کي خدشا آهن، آدمشماري بابت خدشن کي لاڳاپيل فورمن تي اٿاريو ويندو.
سندس چوڻ هو ته 9 مئي جي واقعن جي سڄي قوم مذمت ڪئي آهي، ڏکي حالتن ۾ به رياست مخالف قدم نه کنيا، عمران خان جي پارٽي بي جي پي جي ڪاپي آهي.
مملڪتي وزير فيصل ڪريم ڪنڊي چيو ته آمريڪا تي ٽرمپ، پاڪستان تي عمران خان ۽ ڀارت تي مودي جو مڙهجڻ دنيا جي بدقسمتي آهي، سياسي ڊيڊلاڪ خاتمي جو واحد حل ڳالهيون آهن عمران خان ڳالهين ڪري ها ته حالتون اهڙو رخ اختيار نه ڪن ها.
هن چيو ته عمران خان جو سفر آمريڪي سائفر کان شروع ٿي ڪري آمريڪا جي مدد تي ختم ٿيو آهي، عمران خان ٻٽو معيار اختيار ڪرڻ تي قوم ۽ ڪارڪنن کان معافي وٺي.
سندس چوڻ هو ته پيپلز پارٽي جي سي اي سي اجلاس ۾ ملڪي صورتحال بابت تفصيلي غور ڪيو ويو، پ پ 9 مئي واقعن جي ڀرپور مذمت ڪئي ۽ ملوث جوابدارن خلاف سخت ڪارروائي جي حمايت ڪئي.
ممڪلتي وزير فيصل ڪريم ڪنڊي چيو ته سرڪاري ملڪيتن تان قومي جهنڊا لاهي پي ٽي آءِ جا جهنڊا هنيا ويا، 9 مئي جي واقعن جي سڄي دنيا مذمت ڪري رهي آهي، پ پ ڪڏهن به قانون جي ڀڃڪڙي ناهي ڪئي، پرڏيهي وزير بلاول ڀٽو زرداري ٽن ڏينهن وارو ڪشمير جو دورو ڪري رهيو آهي.
سندس چوڻ هو ته بلاول ڀٽو زرداري ڪشمير ۾ پارليامينٽيرينز سان آجياڻي ۾ ملاقات ڪندو جڏهن ته سڀاڻي قانون ساز اسيمبليءَ کي خطاب به ڪندو ۽ ٻئي ڏينهن ڪشمير باغ ۾ جلسي کي خطاب ڪندو.
مملڪتي وزير فيصل ڪريم ڪنڊي چيو ته پ پ هميشه ڪشمير جي ڳالهه ڪئي آهي، ڪجهه ملڪن والاريل ڪشمير ۾ ڪانفرنس ۾ شرڪت کان انڪار ڪيو آهي، ذوالفقار علي ڀٽو 1974ع ۾ ڪشميرين کي هڪ آئين ڏنو، بلاول ڀٽو زرداري پنهنجي امڙ ۽ ناني جي مشن کي اڳتي وڌايو آهي ۽ هر فورم تي ڪشمير جو ڪيس وڙهيو آهي.
