وزيراعظم شهباز شريف چيو آهي ته فوجي ٿاڪن تي حملن جا ڪيس قانون موجب فوجي عدالتن هلندا، وڳوڙن ۾ ملوث جوابدارن سان ڪنهن به قسم جي رعايت نه ڪئي ويندي.
وزيراعظم شهباز شريف جي صدارت هيٺ لاهور ۾ امن امان بابت اعليٰ سطحي اجلاس ٿيو.
اجلاس ۾ پنجاب جي نگران وڏي وزير محسن نقوي ۽ سڪيورٽي اختيارين شرڪت ڪئي.
اعليٰ سطحي اجلاس دوران پنجاب حڪومت طرفان 9 مئي بابت گرفتارين ۽ ڪاررواين جي رپورٽ پيش ڪئي وئي.
ملڪي سياسي صورتحال بابت به صلاح مشورا ڪيا ويا.
اجلاس کي خطاب ڪندي وزيراعظم شهباز شريف چيو ته 9 مئي تي عمران نيازي جي هدايت تي سندس هٿياربند ٽولن دهشتگردي ڪئي.
هن چيو ته عمران نيازي اهو ڪري ڏيکاريو جيڪو دشمن 75 سالن دوران به نه ڪري سگهيو، وڳوڙ قوم کي هميشه ذهني تڪليف ۾ مبتلا رکندا.
سندس چوڻ هو ته سويلين ٿاڪن تي حملن ۾ ملوث جوابدارن جا ڪيس دهشتگردي ٽوڙ عدالتن ۾ هلندا ۽ فوجي ٿاڪن تي حملن جا ڪيس قانون موجب فوجي عدالتن ۾ هلايا ويندا.
وزيراعظم شهباز شريف چيو ته 9 مئي واقعن جي رٿا بندي ڪندڙ به قانون جي گرفت کان بچي نه سگهندا، ڀڙڪائيندڙ، نعرا هڻندڙ ۽ ڀڃ ڊاهه ۾ ملوث ڪو به شخص بچي نه سگهندو.
هن چيو ته آڊيو ليڪس بابت عدالتي ڪميشن جي رپورٽ اچڻ کانپوءِ سڀ ڪجهه واضح ٿي ويندو.
سندس چوڻ هو ته ڪابينا ڪميشن آف انڪوائريز ايڪٽ 2017ع تحت آڊيو ليڪس ڪميشن قائم ڪئي، عمران نيازي پنهنجي ضد ۽ انا سبب ملڪ کي نقصان پهچايو، عمران خان جيڪو ملڪ کي نقصان پهچايو تنهن جو مثال نه ٿو ملي.
وزيراعظم شهباز شريف وزيرن کي هدايت ڪئي ته ملڪ ۽ قوم کي گڏ ڪرڻ، حالت بهتر ڪرڻ، ادارن ۽ عوام ۽ ادارن ۾ اعتماد جو ماحول برقرار رکڻ لاءِ محنت ڪئي وڃي، مڪ، قوم ۽ سڀ ادارا سندن پنهنجا آهن، ادارن ۾ ڏار وجهندڙ ملڪ جي سڄڻ نه آهن.
وزيراعظم شهباز شريف هدايت ڪئي ته بجيٽ ۾ عوام کي رليف فراهم ڪرڻ لاءِ قدم کنيا وڃن، مهانگائي جي دور ۾ غريب عوام کي رليف ڏيڻ جي ڪوشش ڪئي پئي وڃي
