لاڙڪاڻي جي سينٽرل جيل جي گيٽ تي پوليس اهلڪارن ۾ جهيڙي جي نتيجي ۾ هڪ اهلڪار زخمي ۽ ڪجهه اهلڪارن جون ورديون ليڙون ليڙون ٿي ويون.
سينٽرل جيل ۾ سرڪاري لوهه سان ڀريل ٽريڪٽر مک گيٽ تي پهتو ته ڊيوٽي تي موجود پوليس اهلڪارن روڪي ورتو.
لوهه سان ڀريل ٽريڪٽر کي روڪڻ تان پوليس اهلڪارن ۾ جهيڙو ٿي پيو.
جهيڙي دوران ڏنڊا، مڪون ۽ لتون لڳڻ سبب پوليس اهلڪار سيد عشرت شاهه زخمي ٿي پيو جڏهن ته ڪجهه اهلڪارن جون ورديون ليڙون ليڙون ٿي ويون.
پوليس اهلڪارن ڪوريج لاءِ پهتل سنڌ ٽي وي نيوز جي ڪيمرامين جاويد جنجوٽه ۽ ٻين ڪيمرامينن تي الرون ڪري بداخلاقي ڪئي.
زخمي پوليس اهلڪار سيد عشرت شاهه ميڊيا سان ڳالهائيندي الزام هڻندي چيو ته هو سينٽرل جيل جي مک گيٽ تي ڊيوٽي ڪري رهيو هو ته جيل سپرينٽينڊنٽ پاران مقرر ڪيل پوليس اهلڪار ذوالفقار موريو، امتياز کوسو، همت جاگيراڻي ۽ ٻيا سرڪاري لوهه کڻي وڃي رهيا هئا.
هن چيو ته لوهه ٻاهر کڻي وڃڻ کان روڪڻ تي ذوالفقار موريو، امتياز کوسو، همت جاگيراڻي ۽ ٻين مٿس حملو ڪري تشدد جو نشانو بڻايو.
سندس چوڻ هو ته پوليس اهلڪارن سندس بيمار پٽ کي به تشدد جو نشانو بڻائي زخمي ڪري ڇڏيو آهي.
زخمي پوليس اهلڪار چيو ته ڄاڻايل پوليس اهلڪار جيل جو ماحول خراب ڪري رهيا آهن ۽ ملاقاتن لاءِ ايندڙ ماڻهن کان رشوت وٺي ناجائزي ڪري رهيا آهن.
زخمي پوليس اهلڪار اعليٰ اختيارين کان مطالبو ڪيو ته معاملي جو نوٽيس وٺي ڄاڻايل پوليس اهلڪارن خلاف ڪارروائي ڪري تحفظ فراهم ڪيو وڃي.
