لاهور هاءِ ڪورٽ راولپنڊي بينچ پي ٽي آءِ اڳواڻ شيرين مزاري جي گرفتاريءَ کي ڪالعدم قرار ڏيندي کيس آزاد ڪرڻ جو حڪم ڏئي ڇڏيو.
لاهور هاءِ ڪورٽ راولپنڊي بينچ ۾ جسٽس چوڌري عبدالعزيز پي ٽي آءِ اڳواڻ شيرين مزاري جي نظربندي خلاف درخواست جي ٻڌڻي ٿي.
ٻڌڻي دوران شيرين مزاري جي نياڻي ايمان مزاري، وڪيل بئريسٽر شعيب رزاق، انيق کٽانه ۽ ٻيا عدالت ۾ پيش ٿيا.
عدالت پي ٽي آءِ اڳواڻ شيرين مزاري جي گرفتاريءَ کي ڪالعدم قرار ڏيندي کيس آزاد ڪرڻ جو حڪم ڏئي ڇڏيو.
عدالت چيو ته شيرين مزاري ڪنهن ڪيس ۾ نامزد ناهي ته کيس ٻيهر گرفتار نه ڪيو وڃي ۽ شيرين مزاري ڊپٽي ڪمشنر وٽ قسم نامو جمع ڪرائي ته ٻيهر ڪنهن اهڙي سرگرمي ۾ شامل نه ٿيندي.
ان موقعي تي ميڊيا سان ڳالهائيندي شيرين مزاري جي نياڻي ايمان مزاري چيو ته سندس والده کي هڪ هفتي ۾ ٽي ڀيرا گرفتار ڪيو ويو پر اڄ عدالت کيس آزاد ڪرڻ جو حڪم ڏنو آهي.
سندس چوڻ هو ته حڪومت کي سوچڻ گهرجي ته گهرن کي اهڙي طرح برباد نه ڪيو وڃي.
ايمان مزاري چيو ته سندس تحريڪ انصاف سان ڪوبه به تعلق ناهي پر افسوس جي ڳالهه آهي عمران خان ڪارڪنن ۽ اڳواڻن کي وساري ڇڏيو آهي.
