قمبر ۾ نوجوان جو زرعي زمين مان گوليون لڳل لاش هٿ آيو آهي.
ٻير روڊ ڀرسان نوجوان جو گوليون لڳل ۽ تشدد ٿيل لاش زرعي زمين مان مليو.
ڳوٺاڻن لاش کي ڏسي ڪري پوليس کي اطلاع ڏنو.
اطلاع ملڻ بعد پوليس واقعي واري هنڌ پهچي لاش کڻائي پوسٽ مارٽم لاءِ ڊي ايڇ ڪيو اسپتال پهچايو جتي مقتول جي سڃاڻپ 18 ورهين جي رضوان پٽ سائين ڏنو گوپانگ طور ٿي.
اسپتال مان ضروري ڪارروائي بعد نوجوان جو مڙهه وارثن حوالي ڪيو ويو.
18 ورهين جي رضوان گوپانگ جو مڙهه گهر پهچڻ تي ڪهرام مچي ويو.
مقتول نوجوان جي والد سائين ڏنو گوپانگ جو چوڻ آهي ته ڪنهن سان به دشمني نه آهي نوجوان سموسا کپائي گذر سفر ڪندو هو.
سندس چوڻ هو ته هڪ مهينو اڳ پٽ جي شادي ڪرائي هئي جنهن جي هٿن تان اڃا مهندي به نه لٿي آهي ظالمن وڏو ظلم ڪيو آهي.
مقتول نوجوان جي والد آءِ جي سنڌ، ڊي آءِ جي لاڙڪاڻي ۽ ايس ايس پي قمبر شهدادڪوٽ کان مطالبو ڪيو نوجوان جي قاتلن کي گرفتار ڪري انصاف ڪيو وڃي
