وفاقي وزير شاهه زين بگٽي چيو آهي ته منشيات هڪ وڏو مسئلو بڻجي چڪو آهي، ننڍڙا ٻار به منشيات جا عادي ٿي ويا آهن، وفاقي حڪومت منشيات جي خاتمي لاءِ صوبائي سرڪار سان گڏجي ڪم ڪري رهي آهي.
وفاقي وزير شاهه زين بگٽي ۽ صوبائي صلاحڪار اعجاز جکراڻي ملير جيل ۾ منشيات جي عادي قيدين جي علاج لاءِ قائم ڪيل سينٽر جو افتتاح ڪيو.
ان موقعي تي وفاقي وزير شاهه زين بگٽي جي ميڊيا سان ڳالهائيندي چيو ته سنڌ ۾ منشيات جي خاتمي لاءِ 8 سينٽر قائم ڪيا ويا آهن، منشيات سندن پاڙيسري ملڪن مان ايندي آهي.
هن چيو ته 9 مئي جا واقعا مذمت جوڳا آهن، ذوالفقار علي ڀٽو، بينظير ڀٽو، اڪبر بگٽي جا جهڙا واقعا ٿيا پر پوءِ به اهڙي قسم جا وڳوڙ نه ٿيا، 9 مئي تي هڪ سازش تحت حملا ڪرايا ويا.
ان موقعي تي صوبائي صلاحڪار اعجاز جکراڻي ڳالهائيندي چيو ته وڏي وزير جي خاص هدايتن تي منشيات جي خاتمي لاءِ ڪم جاري آهي.
هن چيو ته پيپلز پارٽي جي قيادت پنهنجي ڪارڪنن جي سياسي تربيت ڪرڻ ڄاڻي ٿي، اهو ئي سبب آهي جو پاڪستان پيپلزپارٽي جو هر ڪارڪن قانون جو احترام ڪندو آهي.
ان موقعي تي آءِ جي جيل سيد انور شاھ، جيل سپريڊنٽ سيد ارشد شاھ، ڊپٽي جيل سپريڊنٽ ذولفقار پيرزادو ۽ اينٽي نارڪو ٽيڪس جا آفيسر پڻ موجود هئا
