جيئي سنڌ محاذ جي چيئرمين رياض چانڊئي سنڌ کي اقليت ۾ تبديل ڪرڻ لاءِ هٿرادو آدمشماري ڪري سنڌ سان ناانصافي ڪئي وئي آھي، آدمشماري جو وقت وڌائي ڪراچي جي آبادي کي وڌيڪ ڳڻيو ويو آھي، وفاقي حڪومت ۽ سنڌ سرڪار سنڌ کي تباهه ڪرڻ کانپوءِ سنڌ جي آدمشماري ۾ به سنڌ سان ويساهه گهاتي ڪئي آھي جيڪا ڪنهن به صورت ۾ قبول نه ڪندا.
ميرپورخاص ۾ ڪانفرنس کي خطاب ڪندي رياض چانڊئي چيو ته 2023 جي آدمشماري ملڪ ۽ عالمي معيار جي خلاف آھي، سنڌ جي ماڻھن کي قانون موجب ناهي ڳڻيو ويو، ڏيڍ مهيني اندر آدمشماري جو وقت وڌائي ڪراچي جي آبادي هڪ ڪروڙ 37 لک ظاهر ڪئي بعد ۾ ان کي هڪ ڪروڙ 90 لک ظاهر ڪيو ويو.
هن چيو ته سنڌ ۾ 50 لک کان وڌيڪ پرڏيهي آباد آھن، پ پ به پرڏيهين جي تصديق ڪئي پر ان باوجود کين نه ڪڍيو ويو ۽ نه ئي وري 50 لک پرڏيهي ماڻھن کي آدمشماري ۾ الڳ ڪيو ويو.
سندس چوڻ هو ته هي آدمشماري جماعت اسلامي ۽ ايم ڪيو ايم جي چوڻ تي ڪرائي وئي سنڌ سرڪار سياسي پارٽين جي چوڻ تي آدمشماري ڪرائي سنڌ سان زيادتي ڪئي آھي،اهڙي آدمشماري کي ڪنهن به صورت ۾ قبول نه ڪندا، ان ڪري سموري سنڌ ۾ 28 مئي تي احتجاج ڪيو ويندو.
رياض چانڊئي چيو ته سنڌ معدني وسيلن سان مالا مال آھي پر سنڌ جي عوام اٽي لاءِ به پريشان آھي ۽ ماڻهو آپگهات ڪرڻ تي مجبور آھي، عوام ۾ شعور پيدا ٿي ويو آھي جيڪي هاڻ ٺڳ حڪمرانن کي ڪڏهن به برداشت نه ڪندا
