پابندي مڙهيل تنظيم بي اين اي جي گرفتار سربراهه گلزار امام شمبي کي ميڊيا اڳيان پيش ڪيو ويو آهي،سندس چوڻ آهي ته هٿياربند جدوجهد غلط رستو آهي، اميد آهي ته رياست ماءُ جو ڪردار ادا ڪندي کيس سڌاري جو موقعو ڏيندي، بلوچ شهرين کي هٿياربند جدوجهد ڪرڻ بدران واپسي جو رستو اختيار ڪرڻ گهرجي.
صوبائي گهرو وزير ضياءَ لانگو سان گڏ پريس ڪانفرنس ڪندي گلزار امام شمبي چيو ته هو 15 سالن کان بلوچستان جي حقن لاءِ هلندڙ هٿياربند جدوجهد جو حصو رهيو آهي ۽ هر قسم جي حالتن کي منهن ڏنو آهي.
هن چيو ته بلوچ جي حيثيت سان سندس مقصد پنهنجي قوم ۽ خطي جي حفاظت ڪرڻ آهي، کيس ڪجهه ڏينهن اڳ گرفتار ڪيو ويو، بلوچستان جي حقن جي جنگ رڳو آئيني ۽ سياسي طريقي سان ئي ممڪن آهي.
سندس چوڻ هو ته هن رياست کي سمجهڻ کانسواءِ هٿياربند جدوجهد ڪئي، هن غلط رستي جي چونڊ ڪئي ڇاڪاڻ ته هٿياربند جدوجهد سان بلوچستان جي مسئلن ۾ اضافو يٿ ويو.
گلزار امام شمبي چيو ته ڪجهه طاقتون بلوچن کي رڳو هڪ پريشر گروپ طور استعمال ڪرڻ چاهين ٿيون جنهن جو نقصان رڳو بلوچ قوم جو ٿي رهيو آهي جنهن سبب بلوچستان پوئتي پئجي ويو آهي.
هن چيو ته هٿياربند جدوجهد ۾ شامل بلوچ شهرين کي واپسي جو رستو اختيار ڪرڻ گهرجي ته جيئن گڏجي صوبي جي مسئلن کي حل ڪري سگهجي.
سندس چوڻ هو ته بلوچستان ۾ سيڙپڪاري ۽ ترقي نه هئڻ برابر آهي، بلوچ شاگردن کي به ويڙهه ۾ وقت ضايع ڪرڻ بدران صوبي جي ترقي لاءِ ڪم ڪرڻ گهرجي.
گلزار امام شمبي چيو ته هر ملڪ جا پنهنجا مفاد هوندا آهن، بلوچستان جي جاگرافيائي اهميت کان ڪير انڪار نه ٿو ڪري سگهي، صوبي تي دنيا جون نظرون آهن، بلوچن کي ضرور ڪٿان نه ڪٿان مدد ملي رهي آهي.
