اسلام آباد هاءِ ڪورٽ تحريڪ انصاف جي سيڪريٽري جنرل اسد عمر جي ٿري ايم پي او تحت گرفتاري ڪالعدم قرار ڏيندي کيس آزاد ڪرڻ جو حڪم ڏئي ڇڏيو.
اسلام آباد هاءِ ڪورٽ ۾ اسد عمر خلاف ڪيسن جي تفصيلن جي فراهمي ۽ گرفتاري خلاف ڪيس جي ٻڌڻي جسٽس ميان گل حسن اورنگزيب ڪئي.
ٻڌڻي دوران تحريڪ انصاف جي سيڪريٽري جنرل اسد عمر جو وڪيل بابر اعواڻ ۽ ٻيا عدالت ۾ پيش ٿيا.
ٻڌڻي دوران جسٽس ميان گل حسن اورنگزيب چيو ته هو اوهان کي نه ڇڏيندا، جيستائين اوهان پريس ڪانفرنس نه ڪندا، جنهن تي اسد عمر جي وڪيل بابر اعواڻ چيو ته پريس ڪانفرنس ته هو نه ڪندا.
جسٽس ميان گل حسن اورنگزيب چيو ته اسد عمر جا ٻه ٽوئيٽ آهن اهي فوري طور ڊليٽ ڪرايو، وڪيل بابر اعواڻ چيو ته اها خبر آهي پر هو اوهان جي حڪم تي عمل ڪندا.
وڪيل بابر اعواڻ اپيل ڪندي چيو ته عدالت اسد عمر کي هن عدالت ۾ پيش ڪرڻ جو حڪم ڏئي.
جسٽس ميان گل حسن اورنگزيب، تحريڪ انصاف جي سيڪريٽري جنرل اسد عمر جي ٿري ايم پي او تحت گرفتاري ڪالعدم قرار ڏيندي کيس آزاد ڪرڻ جو حڪم ڏئي ڇڏيو.
عدالت اسد عمر کي قسم نامو جمع ڪرائڻ جو حڪم ڏنو ۽ چيو ته جيڪڏهن قسم نامي جي ڀڃڪڙي ڪئي ته سياسي ڪيريئر کي وساري ڇڏيو.
