پي ٽي آءِ جي مرڪزي سيڪريٽري جنرل اسد عمر پارٽي عهدا ڇڏڻ جو اعلان ڪري ڇڏيو، سندس چوڻ آهي ته 9 مئي واقعن بعد پارٽيءَ جو ذميواريون ادا ڪرڻ ممڪن ناهي، ان ڪري جنرل سيڪريٽري ۽ ڪور ڪميٽيءَ جي عهدن تان استعيفيٰ ڏي ٿو، 9 مئي واقعن جي شفاف جاچ ٿيڻ گهرجي، ملوث ماڻهن کي سزا ۽ بيگناهه ماڻهن کي جلد ڇڏيو وڃي.
اسلام آباد ۾ پريس ڪانفرنس ڪندي اسد عمر چيو ته پندرهن ڏينهن قيد ۾ گذاريو، 9 مئي تي ڪيترن ئي ماڻهن جون حياتيون ضايع ٿيون، سرڪاري ۽ خانگي ملڪيتن کي نقصان پهتو، سڀ کان خطرناڪ فوجي هنڌن تي حملا ٿيا.
هن چيو ته فوج جي طاقت بندوقن کانسواءِ عوام آهي، جيڪو سندن پويان بيٺل هوندو آهي، 9 مئي واقعن جي شفاف جاچ ٿيڻ گهرجي، ملوث ماڻهن کي سزا ۽ بيگناهه ماڻهن کي جلد ڇڏيو وڃي.
اسد عمر چيو ته پاڪستان جا 5 اسٽيڪ هولڊر آهن، عدليا ورهايل آهي، فيصلن تي عمل نه پيو ٿئي، فوج ٻيو وڏو اسٽيڪ هولڊر آهي، ٽيون پي ٽي آءِ ۽ چوٿون اسٽيڪ هولڊر عوام آهي.
پي ٽي آءِ اڳواڻ چيو ته پي ڊي ايم جي سياست تيرهن مهينن ۾ ڪمزور ٿي، پر ڪنهن به اسٽيڪ هولڊر کي موجوده صورتحال مان فائدو نه پيو ٿئي، ملڪ کي انهن حالتن مان ڪڍڻ سياسي پارٽين جو ڪم آهي.
اسد عمر چيو ته 9 مئي واقعن بعد هو پارٽيءَ جون ذميواريون ادا نه ٿو ڪري سگهي، ان ڪري جنرل سيڪريٽري ۽ ڪور ڪميٽيءَ جي عهدن تان استعيفيٰ ڏئي رهيو آهي.
هڪ سوال جي جواب ۾ اسد عمر چيو ته هن عهدن تان استعيفيٰ ڏني آهي پارٽي ناهي ڇڏي.
پي ٽي آءِ اڳواڻ چيو ته چيف جسٽس بار بار چئي چڪو آهي ته سياسي مسئلن جو حل ڳالهيون آهي، دوست ملڪ به پاڪستان ۾ استحڪام چاهن ٿا.
