وزيراعظم شهباز شريف چيو آهي ته 9 مئي جي وڳوڙين ۽ دشمنن ۾ ڪو به فرق ناهي، وڳوڙين کي آئين ۽ قانون تحت سزا ملندي، قيامت تائين ڪو به پاڪستان ڏانهن ميري اک کڻي ڏسي نه ٿو سگهي، ريڊيو پاڪستان پشاور ۾ باهه ڏسي کيس تمام گهڻو صدمو پهتو آهي، تاريخي ۽ قومي ورثي کي باهه ڏيڻ ڪٿان جي حب الوطني آهي.
وزيراعظم شهباز شريف هڪ ڏينهن جي دوري تي پشاور پهتو.
وزيراعظم 9 مئي وڳوڙن ۾ متاثر ريڊيو پاڪستان پشاور جو دورو ڪري ملازمن کي پگهارون فوري طور ڏيڻ جي هدايت ڪئي.
ريڊيو پاڪستان پشاور ۾ تقريب کي خطاب ڪندي وزيراعظم شهباز شريف چيو ته ريڊيو پاڪستان جي تاريخي عمارت تي حملي تي هو سڀ ڏکارا آهن.
سندس چوڻ هو ته هي تاريخي عمارت آهي جنهن ۾ پاڪستان ٺهڻ کان اڳ ريڊيو جو نظام موجود هو، ان عمارت مان 14 آگسٽ 1947ڳ تي آزادي جون صدائون بلند ٿيون.
وزيراعظم شهباز شريف چيو ته ريڊيو پاڪستان پشاور مان ئي ملڪ جي آزاديءَ جو اعلان ڪيو ويو، 9 ۽ 10 مئي تي دل ڏکوئيندڙ واقعن تي عوام ڏکارو آهي.
هن چيو ته تاريخي ۽ قومي ورثي کي باهه ڏيڻ ڪٿان جي حب الوطني آهي؟، چاغي جي يادگار کي به ساڙي رک بڻايو يو، قومون پنهنجي تاريخي ورثي ۽ سڃاڻپ جي حفاظت ڪنديون آهن هتي ساڙيو ويو.
سندس چوڻ هو ته هڪ سال جي رڪارڊ ۽ تاريخي ورثي کي تباهه ڪيو ويو، 9 مئي جي وڳوڙين ۽ دشمنن ۾ ڪو به فرق ناهي.
وزيراعظم شهباز شريف چيو ته وڳوڙين کي آئين ۽ قانون تحت سزا ملندي، قيامت تائين ڪو به پاڪستان ڏانهن ميري اک کڻي ڏسي نه ٿو سگهي……….
