آمريڪي رياست ٽيڪساس ۾ سنڌي ثقافت جو ڏهاڙو سرڪاري طور ملهايو ويندو، رياستي اسيمبلي مان ثقافتي ڏهاڙو سرڪاريءَ طور ملهائڻ جي منظوري ڏئي ڇڏي آهي.
آمريڪي رياست ٽيڪساس جي گادي واري شهر آسٽن ۾ رياستي اسيمبليءَ سنڌي ثقافت جو ڏهاڙو سرڪاري طور ملهائڻ جي اجازت ڏني.
ٽيڪساس جي رياستي اسيمبلي ۾ سنڌي ثقافت جو ڏهاڙو سرڪاري طور ملهائڻ وارو ٺهراءُ پيش ڪيو ويو.
اهو ٺهراءُ رياست جي نمائندي ڊاڪٽر سليمان لالاڻي پيش ڪيو، جنهن ۾ هن اپيل ڪئي ته سنڌي ثقافت جو ڏهاڙو سرڪاري طور ملهائڻ جي منظوري ڏني وڃي، ايوان اهو ٺهراءُ منظور ڪري ورتو.
ڊاڪٽر سليمان لالاڻي چيو ته سنڌي ثقافت جو ڏهاڙو هر سال ڊسمبر جي پهرين آچر تي ملهايو ويندو ۽ دنيا جي ڪنڊڪڙڇ ۾ رهندڙ سنڌي ان ڏينهن ثقافتي ويس وڳا پهرين پنهنجي ثقافت سان محبت جو اظهار ڪندا آهن.
سندس چوڻ هو ته ڊسمبر ۾ اسيمبلي جو سيشن نه هو، ان ڪري هو اڄ سنڌي ثقافت جو ڏهاڙو ملهائي رهيا آهن، ان ڪري هو سمورن ميمبرن کي ثقافتي ڏهاڙو ملهائڻ واري تقريب جي دعوت ڏي ٿو.
مسلم بڙدي پنهنجي بيان ۾ چيو ته اتر آمريڪين سنڌين لاءِ وڏو تاريخي ڏينهن آهي، سنڌي ثقافت ۽ سڃاڻپ واري تقريب جي منظوري جو اعلان ٿي رهيو آهي.
هن چيو ته درخواست جي منظوري بعد ٽيڪساس رياست ۾ سرڪاري طور سنڌي ثقافتي ڏهاڙي کي تسيم ڪيو ويندو.
مسلم بڙدي چيو ته ڊسمبر ۾ هو سنڌي ثقافت جو ڏهاڙو پنهنجي طور ملهائيندا آهن، پر هاڻي ٽيڪساس جي رياستي اسيمبلي مان ان ڏينهن کي سرڪاري طور ملهائڻ جي منظوري ٿي رهي آهي.
هن چيو ته هن تاريخي ڪم جي شروعات ۽ اڳواڻي رياست جي نمائندي ڊاڪٽر سليمان لالاڻي ڪئي ۽ بهتر ڪميونٽي سروس لاءِ سرگرم ڪردار ادا ڪرڻ تي همٿايو.
