پرڏيهي وزير بلاول ڀٽو زرداري چيو آهي ته افغانستان ۾ امن سان خطي کي فائدو ٿيندو، ڪابل جي ترقي سان ئي پاڪستان ترقي ڪندو، جي ٽوئنٽي اجلاس ۾ شرڪت نه ڪرڻ ڏکيو فيصلو پر اهو سٺو ثابت ٿيو، ان ذريعي پاڪستان جو موقف آڏو رکيو، ايس سي او ۾ مسلمانن ۽ ڪشميرين خلاف موقف کي منهن ٽوڙ جواب ڏنو.
سينيٽ جي پرڏيهي معاملن بابت اسٽيڊنگ ڪميٽيءَ کي شنگهائي سهڪار تنظيم جي اجلاس بابت بريفنگ ڏيندي پرڏيهي وزير بلاول ڀٽو زرداري چيو ته شنگهائي سهڪار تنظيم اجلاس ۾ سمورن ميمبر ملڪن کي افغان صورتحال تي ڳڻتي هئي.
هن چيو ته افغان عبوري حڪومت کي درخواست آهي ته هو سندن ڀلائي چاهن ٿا، اهي ترقي ڪندا ته پاڪستان ترقي ڪندو، ڪابل ۾ اقتدار جي تبديلي جي 600 ڏينهن بعد سرحد تان 50 حملا ٿيا.
پرڏيهي وزير چيو ته ٽي ٽي پي، مجيد برگيڊ ۽ بلوچ لبريشن آرمي جهڙن مسئلن تي افغان اختياريون سندن خدشا ختم ڪن، هو ان معاملي ۾ واضح آهن.
بلاول ڀٽو زرداري چيو ته جيڪي ماڻهو سندن آئين نه ٿا مڃن، هٿيار کڻن ٿا انهن خلاف موقف واضح آهي.
پرڏيهي وزير چيو ته جي ٽوئنٽي ڪانفرنس والاريل ڪمشير ۾ ڪرائڻ غيرقانوني قدم آهي، ان سان ڀارت جو مڪروهه چهرو دنيا آڏو اچي ويو آهي، ڀارت گڏيل قومن جي سلامتي ڪائونسل ۽ عالمي قانون نظرانداز ڪري اهو قدم کنيو.
بلاول ڀٽو زرداري چيو ته جي ٽوئنٽي اجلاس ۾ شرڪت نه ڪرڻ ڏکيو فيصلو پر اهو سٺو ثابت ٿيو، ان ذريعي پاڪستان جو موقف آڏو رکيو، ايس سي او ۾ مسلمانن ۽ ڪشميرين خلاف موقف کي منهن ٽوڙ جواب ڏنو.
ان کان اڳ اسلام آباد ۾ هوائي فوج جي ميڊيڪل ڪاليج جي ڪانووڪيشن کي خطاب ڪندي بلاول ڀٽو زرداري چيو ته پاس ٿيندڙ سمورن شاگردن کي واڌايون ڏيان ٿو، شاگرد معاشري جي بهتري لاءِ ڪردار ادا ڪري سگهن ٿا، هر ايندڙ ڏکيائي اوهان کي وڌيڪ مضبوط ڪندي.
سندس چوڻ هو ته دنيا هن وقت چئلينجن کي منهن ڏئي رهي آهي، سندن پرڏيهي پاليسي بهتري طرف وڌي رهي آهي.
پرڏيهي وزير بلاول ڀٽو زرداري چيو ته دنيا هن وقت موسمياتي تبديلن کي منهن ڏئي رهي آهي، موسمياتي تبديلين سبب ٿيندڙ نقصان تي دنيا پاڪستان سان گڏ آهي.
هن چيو ته ڏکي وقت ۾ دنيا جو پاڪستان سان گڏ بيهڻ دشمنن کي منهن ٽوڙ جواب آهي، مختلف ملڪ چئلينجن کي منهن ڏئي رهيا آهن.
پرڏيهي وزير بلاول ڀٽو زرداري چيو ته گهٽ وسيلن سان اسپتالون ٺاهي عوام جي خدمت ڪئي پئي وڃي، گمس ۽ جناح اسپتال سميت ٻين اسپتالن ۾ جديد ترين سهولتون فراهم ڪيون ويون آهن.
