مملڪتي وزير مصدق ملڪ چيو آهي ته سياسي پارٽين وچ ۾ تڪرارن کي ختم ڪرڻو پوندو، ائين ته ڪرياني جو دڪان نٿو هلي سگهي، اوهان ملڪ ڪيئن ٿا هلائي سگهو؟، ايندڙ 15 کان 20 ڏينهن ۾ پاڪستان ۾ روسي تيل هوندو، روس کان رعايتي اگهه تي تيل ملي رهيو آهي، گيس تي 17 سئو ارب رپين جو گردشي قرض هو اسان اهو ٻڙي ڪري ڇڏيو، ايل اين جي تي به گردشي قرض ٻڙي ڪيو ويندو.
خانگي ٽي وي سان ڳالهائيندي مصدق ملڪ چيو ته تاريخ ۾ پهريون ڀيرو ٻه روسي وزير 86 رڪني وفد سان گڏ پاڪستان آيا، روس کان سستو تيل ملي رهيو آهي.
سندس چوڻ هو ته ايندڙ 15 کان 20 ڏينهن ۾ پاڪستان ۾ روسي تيل هوندو، گيس تي 17 سئو ارب رپين جو گردشي قرض هو اسان اهو ٻڙي ڪري ڇڏيو، ايل اين جي تي به گردشي قرض ٻڙي ڪيو ويندو.
مملڪتي وزير مصدق ملڪ چيو ته حڪومت طرفان اهم فيصلا ڪيا پيا وڃن، حالتون بهتر ڪرڻ لاءِ ڏکيا فيصلا ڪيا پيا وڃن، اڳتي وڌڻ لاءِ ننڍو ڪاروبار ڪندڙن کي هٿي وٺرائڻي پوندي.
هن چيو ته بجيٽ ۾ ننڍو ڪاروبار ڪندڙن کي سهولتون ڏيڻ بابت غور ڪري رهيا آهن، کين تاپي گيس منصوبي کان سستي گيس آڻڻي آهي جنهن تي تيزي سان ڪم ڪري رهيا آهن.
مملڪتي وزير مصدق ملڪ چيو ته آٽو موٽو پاليسي ٺاهڻ کي ڪيترائي سال ٿي چڪا آهن، اڄ تائين هو هڪ انڊيڪيٽر جو ڪور ناهن ٻاهر اماڻي سگهيا، سندس خيال ۾ آٽو موٽو پاليسي بهتر ناهي.
سندس چوڻ هو ته عمران خان 190 ملين پائونڊز سپريم ڪورٽ جي اڪائونٽ ۾ جمع ڪرايا، اهي پيسا پاڪستان جي اڪائونٽ ۾ اچڻا هئا.
مملڪتي وزير مصدق ملڪ چيو ته آئين ۽ قانون کان مٿانهون ڪجهه نه ٿيڻ گهرجي، 9 مئي جي وڊيو ذريعي ماڻهن جي سڃاڻپ ڪري گرفتار ڪيو پيو وڃي، نادرا مان تصديق بعد گرفتاريون ٿي رهيون آهن، سياسي پارٽين وچ ۾ تڪرارن کي ختم ڪرڻو پوندو، ائين ته ڪرياني جو دڪان نٿو هلي سگهي، اوهان ملڪ ڪيئن ٿا هلائي سگهو؟.
