سنڌ جي مختلف شهرن ۾ روڊ حادثن جي نتيجي ۾ 2 ڄڻا فوت ٿي ويا.
گمبٽ ويجهو قومي شاهراهه تي ٽرالر جو ٽڪر لڳڻ سبب موٽرسائيڪل تي سوار نوجوان فوت ٿي ويو ۽ ٻه ڄڻا زخمي ٿي پيا.
قومي شاهراهه تي حادثي ۾ ڪوٽ لالو واسي زين مغل فوت ٿي ويو ۽ بشير مغل ۽ عورت شهناز زخمي ٿي پيا.
اطلاع تي موٽروي پوليس حادثي واري هنڌ پهچي لاش ۽ زخمين کي کڻائي اسپتال منتقل ڪيو، جتان ضروري ڪارروائي بعد مڙهه وارثن حُوالي ڪيو ويو.
پوليس جو چوڻ آهي ته ڊرائيور حادثي واري هنڌ تان فرار ٿي ويو آهي، سندس گرفتاري لاءِ ناڪا بندي ڪئي پئي وڃي.
ڀريا روڊ واسي نوجوان لاکا روڊ ڀرسان ٽرين مان ڪري فوت ٿي ويو آهي.
پنجاب کان ڀريا روڊ ايندڙ ٽرين مان ڪـِري نوجوان عمران ملاح پٽ شاهنواز سخت زخمي ٿي پيو،
زخمي نوجوان کي ريلوي پوليس ڪنڊيارو اسپتال کڻائي وئي جتي هن زخمن جي سٽ نه سهندي دم ڏئي ڇڏيو.
فوتي نوجوان جو مڙهه اسپتال مان ضروري ڪارروائي کانپوءِ وارثن حوالي ڪيو ويو، مڙهه گهر پهچائڻ تي ڪهرام مچي ويو.
ٻڌايو پيو وڃي ته فوتي نوجوان هڪ هفتو اڳ روزگار جي ڳولا ۾ پنجاب ويو هو جتي ڪم ڪار نه ملڻ ڪري واپس اچي رهيو هو ته ساڻس حادثو پيش آيو.
