ميهڙ ۾ عدالتي اڱڻ ۾ هٿياربندن جي فائرنگ ۾ ٻن قيدين سميت 3 ڄڻا مارجي ويا ۽ هڪ پوليس اهلڪار زخمي ٿي پيو، مقتولن جا لاش ۽ زخمي کي اسپتال منتقل ڪيو ويو، فائرنگ واقعي ۾ ملوث ٽن جوابدارن پاڻمرادو گرفتاري پيش ڪري ڇڏي.
سيڪنڊ سول جج جي عدالت جي احاطي ۾ هٿياربندن جي فائرنگ ۾ ٻن قيدين عبدالستار کونهارو، زاهد کونهارو ۽ ساڻن ملاقات لاءِ آيل محبوب کونهارو مارجي ويا، جڏهن ته هڪ پوليس اهلڪار زخمي ٿي پيو.
واقعي بعد مقتولن جا لاش ۽ زخمي اهلڪار کي اسپتال منتقل ڪيو ويو، جتان پوسٽ مارٽم ڪرائڻ بعد مڙهه وارثن حوالي ڪيا ويا.
فائرنگ واقعي ۾ ملوث ٽن جوابدارن اشرف، ضمير ۽ جبار کونهارو پاڻمرادو گرفتاري پيش ڪري ڇڏي.
پوليس جو چوڻ آهي ته واقعو کونهارا برداري جي ٻن ڌرين ۾ هلندڙ پراڻي تڪرار تان پيش آيو آهي، معاملي جي وڌيڪ جاچ ڪئي پئي وڃي.
مقتولن جا لاش گهر پهچائڻ تي گهر ڀاتين ۾ ڪهرام مچي ويو.
