حڪومت 9 مئي جي وڳوڙن ۾ ملوث جوابدارن جي سڃاڻپ لاءِ قوم کان مدد طلب ڪري ورتي، راڻا ثناءُ الله چيو آهي ته 9 مئي جي وڳوڙن ۾ پرڏيهي هٿ ملوث هئڻ جو شڪ آهي، عمران خان مسلسل هڪ سال کان نفرت جي سياست ڪري رهيو آهي، پي ٽي آءِ چيئرمين ڪيترائي ڀيرا وفاق تي حملا ڪيا، نفرت جي سياست معاشري ۾ ورهاڱي جو سبب هوندي آهي، پي ٽي آءِ پنهنجي وڳوڙين کي رياست تي حملن جي تربيت ڏني، نفرت جي سياست ۾ اندروني ۽ پرڏيهي مددگار شامل آهن، زلمي خليل زاد ٽوئٽس ذريعي ڪنهن لاءِ لابي ڪري رهيو آهي، ماڻهو پنهنجي مرضيءَ سان پي ٽي آءِ ڇڏي رهيا آهن، نفرت جي سياست کي رد ڪيو پيو وڃي.
اسلام آباد ۾ پريس ڪانفرنس ڪندي راڻا ثناءُ الله چيو ته عمران خان مسلسل هڪ سال کان نفرت جي سياست ڪري رهيو آهي، نفرت جي سياست معاشري جي ورهاست جو سبب بڻجندي آهي.
سندس چوڻ هو ته نفرت جي سياست ۾ اندروني ۽ پرڏيهي مددگار شامل آهن، پاڪستان ۾ فتني ۽ ڏڦيڙ لاءِ باقاعده رٿابندي ڪئي وئي، پي ٽي آءِ چيئرمين ڪيترائي ڀيرا وفاق تي حملا ڪيا.
وفاقي گهرو وزير راڻا ثناءَ الله چيو ته پي ٽي آءِ پنهنجي وڳوڙين کي رياستي ادارن تي حملن جي تربيت ڏني، زمان پارڪ ۾ ملڪيتن تي حملن جي رٿابندي ۽ ٽريننگ ڏني وئي، قوم 9 مئي جي فتني ۾ ملوث ماڻهن جي نشاندهي ڪري.
هن چيو ته وقت اچي ويو آهي ته قوم هن فتني بابت فيصلو ڪري، 9 مئي جي واقعن بابت سڄي ملڪ ۾ 499 ايف آءِ آرز داخل ٿيون، 88 ڪيس دهشتگردي ايڪٽ تحت داخل ڪيا ويا، 499 مان رڳو 6 ڪيسن جو فوجي عدالت ۾ امڪان آهي، اهڙو تاثر ڏنو پيو وڃي جيئن سمورن ماڻهن جو ڪيس ملٽري ڪورٽس ۾ هلايو ويندو.
وفاقي گهرو وزير راڻا ثناءُ الله چيو ته پنجاب مان 19 ۽ ڪي پي مان 14 جوابدارن کي ملٽري ڪورٽس ۾ منتقل ڪيو ويو آهي، ملٽري ايڪٽ تڏهن لاڳو ٿيندو آهي جڏهن ڪو بچاءَ بابت ڪنهن منع ٿيل عمارت ۾ داخل ٿئي.
سندس چوڻ هو ته زلمي خليل زاد ٽوئيٽس ڪري ڪنهن لاءِ لابنگ ڪري رهيو آهي؟، جناح هائوس لاهور هڪ ڪيمپ هائوس به هو ۽ ان ۾ حساس دستاويز به هئا.
وفاقي گهرو وزير راڻا ثناءُ الله چيو ته جناح هائوس حملي ۾ حساس دستاويز ساڙيا ويا، شهيد قوم جو فخر آهن، شهيدن جي يادگار کي ساڙڻ ڪٿان جي حب الوطني آهي؟، ملڪي بچاءَ تي ڪنهن به قسم جو ٺاهه نه ڪيو ويندو، موقعي تان مليل شاهدين ۽ نادرا جي مدد سان ڪارروايون ڪيون پيون وڃن.
هن چيو ته وڳوڙين سموريون ڪارروايون ملڪ ۾ ڏڦيڙ پکيڙڻ لاءِ ڪيون آهن، تحريڪ انصاف جا وڳوڙين پنهنجي خلاف شاهديون پاڻ سامهون آنديون، وزيراعظم جي هدايت آهي ته ڪنهن به بيگناهه خلاف ڪارروائي نه ڪئي وڃي.
وفاقي گهرو وزير راڻا ثناءُ الله چيو ته عمران خان جو لانگ مارچ ناڪام ٿيو ته هن مخالفن کي گاريون ڏنيون، ماڻهو بنا ڪنهن دٻاءُ جي تحريڪ انصاف ڇڏي رهيا آهن، ڏڦيڙ ۽ فتني جي سياست کي ماڻهو رد ڪري رهيا آهن.
