سپريم ڪورٽ آڊيو ليڪس جي جاچ بابت عدالتي ڪميشن خلاف درخواستن تي فيصلو محفوظ ڪري ڇڏيو، چيف جسٽس عمر عطا بنديال رمارڪس ڏيندي چيو آهي ته حڪومت ججن ۾ اختلاف پيدا ڪرڻ جي ڪوشش ڪئي آهي، چيف جسٽس آئيني عهدو آهي، حڪومت جي ماتحت ناهي، حڪومت هڪ جج کي پنهنجي مرضي سان مقرر ڪيو، عدالتي ڪميشن جي جوڙجڪ لاءِ چيف جسٽس سان مشورو لازمي هوندو آهي، حڪومت ججن کي پنهنجي مقصد لاءِ ڪيئن استعمال ڪري سگهي ٿي؟ عدليه جي اختيارن ۾ مداخلت نه ڪئي وڃي، 9 مئي کانپوءِ ججن تي تنقيد بند ٿي وئي آهي.
سپريم ڪورٽ ۾ آڊيو ليڪس جي جاچ بابت عدالتي ڪميشن خلاف درخواستن جي ٻڌڻي ٿي.
پي ٽي آءِ چيئرمين عمران خان، سپريم ڪورٽ بار ايسوسي ايشن جي صدر عابد زبيري، رياض حنيف راهي ۽ مقتدر شبير جي داخل درخواستن جي چيف جسٽس عمر عطا بنديال جي سربراهيءَ ۾ پنج رڪني لارجر بينچ ٻڌڻي ڪئي.
ٻڌڻي جي شروعات ۾ اٽارني جنرل منصور عثمان اعواڻ، بينچ ۾ چيف جسٽس جي شموليت تي اعتراض واري ڇڏيو ۽ چيو ته درخواست آهي ته چيف جسٽس هن بينچ جو حصو نه بڻجي.
چيف جسٽس عمر عطا بنديال پڇاڻو ڪندي چيو ته اوهان جو مطلب آهي ته هو بينچ کان ڌار ٿي وڃي، حڪومت ججن ۾ اختلاف پيدا ڪرڻ جي ڪوشش ڪئي آهي، چيف جسٽس آئيني عهدو آهي، حڪومت جي ماتحت ناهي.
سندس چوڻ هو ته حڪومت هڪ جج کي پنهنجي مرضي سان مقرر ڪيو، عدالتي ڪميشن جي جوڙجڪ لاءِ چيف جسٽس سان مشورو لازمي هوندو آهي.
چيف جسٽس عمر عطا بنديال چيو ته حڪومت ججن کي پنهنجي مقصد لاءِ ڪيئن استعمال ڪري سگهي ٿي؟ عدليه جي اختيارن ۾ مداخلت نه ڪئي وڃي، 9 مئي کانپوءِ ججن تي تنقيد بند ٿي وئي آهي.
عدالت آڊيو ليڪس جي جاچ بابت عدالتي ڪميشن خلاف درخواستن تي فيصلو محفوظ ڪري ڇڏيو.
