وفاقي گهرو وزير راڻا ثناءَ الله عدالتي بحران جو ذميوار عمران خان کي قرار ڏئي ڇڏيو، سندس چوڻ آهي ته هي بينچ 9 کان شروع ٿي چئن تي ٽٽي چڪي آهي، جسٽس جمال مندوخيل سينئر ترين جج آهي، مٿس سڀني کي اعتماد آهي، جسٽس قاضي فائز عيسيٰ جو فيصلو عدالتي فيصلو آهي، ججن ۾ اختلاف قومي سانحي کان گهٽ ناهي، پارلياماني ۽ عدالتي بحران عمران خان جي پاليسين جو نتيجو آهي.
سپريم ڪورٽ ٻاهران ميڊيا سان ڳالهائيندي راڻا ثناءُ الله چيو ته جسٽس جمال مندوخيل سينئر ترين جج آهي، مٿس سڀني کي اعتماد آهي، جسٽس جمال جو اختلافي نوٽ سڀني ڏٺو آهي، اختلافي نوٽ ۾ لکيو آهي ته راءِ وٺڻ کانسواءِ فيصلو لکيو ويو اها افسوسناڪ آهي.
سندس چوڻ هو ته جسٽس قاضي فائز عيسيٰ جو پاڻمرادو نوٽيس بابت فيصلو عدالت جو فيصلو آهي، جيستائين قاضي فائز عيسيٰ جي فيصلي کي چئلينج نه ڪيو ويندو اهو اثرائتو رهندو سندس فيصلي کي رد ڪيو ويو آهي.
وفاقي گهرو وزير راڻا ثناءُ چيو ته چيف جسٽس مان پوري قوم جون اميدون لاڳاپيل آهن، فتني خان ملڪ کي سياسي، انتظاميا ۽ معاشي بحران ۾ مبتلا ڪري ڇڏيو آهي.
هن چيو ته هر برائي فتني خان کان شروع ٿيندي آهي ۽ فتني خان تي ئي ختم ٿي رهي آهي، اهڙي بحراني ڪيفيت ڏسي ڏک ٿي رهيو آهي.
وفاقي گهرو وزير راڻا ثناءُ الله چيو ته لاڏلي اسيمبليون ٽوڙي بحران پيدا ڪيو، فتني کي ملڪ ۾ خاص انداز ۽ مختلف طريقي سان متعارف ڪرايو ويو، فتني جو مقصد ملڪ ۾ ڏڦيڙ ۽ ڏکيائيو ن پيدا ڪرڻ آهي.
سندس چوڻ هو ته ٻن صوبن جون اسيمبليون فتني جي چوڻ تي ٽوڙيون ويون، پنجاب ۽ ڪي پي اسيمبليون ٽوڙڻ جي عمل جو جائزو ورتو وڃي.
وفاقي گهرو وزير راڻا ثناءُ الله چيو ته هاڻي قوم کي انصاف ٿيندي نظر اچڻ گهرجي، فتني جي ايجنڊا کي ڪنهن به صورت ۾ پورو نه ٿيڻ گهرجي، صورتحال انتهائي افسوسناڪ ۽ قومي سانحي کان گهٽ ناهي.
