ايشيائي ترقياتي بينڪ پاڪستان ۾ بجلي پهچائڻ جي نظام ۾ بهتري لاءِ 20 ڪروڙ ڊالر قرض جي منظوري ڏئي ڇڏي.
اي ڊي بي طرفان جاري ڪيل پڌرائي ۾ چيو ويو آهي ته قرض جي رقم بجلي جي ورهاست جي نظام ۾ جدت لاءِ استعمال ٿيندي، ورهاست ڪندڙ ڪمپنين جي جٽادار بجلي فراهم ڪرڻ جي صلاحيت ۾ اضافو ٿيندو.
ايشيائي ترقياتي بينڪ جي پڌرائي موجب، شروعاتي مرحلي ۾ ٽن بجلي جي ورهاست ڪندڙ ڪمپنين کي سهڪار فراهم ڪيو ويندو، ليسڪو، ميپڪو ۽ سيپڪو پنهنجي ريجن ۾ توانائي لاءِ هاڪاري ڪردار ادا ڪن.
اي ڊي بي طرفان جاري ڪيل پڌرائي ۾ چيو ويو آهي ته منصوبي تحت 3 لک کان وڌيڪ ايڊوائنسڊ ميٽرنگ انفرا اسٽرڪچر لڳائيندا، ڊيٽا مينجمينٽ ۽ ڪميونيڪيشن سسٽم لڳائڻ به منصوبي جو حصو آهي، منصوبي تحت ساڍا 15 هزار کان وڌيڪ آن لائن ٽرانسفارمرن تي مانيٽرنگ سسٽم لڳائيندا، سسٽم لاهور، ملتان ۽ سکر اليڪٽرڪ سپلاءِ ڪمپنين ۾ لڳايو ويندو.
ايشيائي ترقياتي بينڪ جي پڌرائي موجب، سيپڪو جي 4 گرڊ اسٽيشن جا وولٽيج 66 ڪي وي مان 132 ڪي وي ڪيا ويندا، بجلي پهچائڻ جي نظام ۾ نقصان گهٽ ۽ گهرج پوري ڪرڻ ۾ مدد ملندي، ليسڪو ۾ گهٽ ۾ گهٽ 25 گرڊ اسٽيشن کي جديد بڻايو ويندو.
اي ڊي بي طرفان جاري ڪيل پڌرائي ۾ چيو ويو آهي ته قدمن سان بجلي جي شعبي جا مالي نقصان گهٽ ڪرڻ ۾ به مددگار ثابت ٿيندا، بجلي پهچائڻ جو نظام مضبوط ڪرڻ جو مقصد بجلي جي وڌندڙ گهرج پوري ڪرڻ آهي، بجلي پهچائڻ جي نظام کي اپگريڊ ۽ جديد بڻائڻ به منصوبي جو اهم مقصد آهي.
