فوجي عدالتن ۾ سويلين جي ٽرائل خلاف ڪيس ۾ سپريم ڪورٽ فل ڪورٽ جوڙڻ واري درخواست تي فيصلو محفوظ ڪري ورتو آهي، جيڪو سڀاڻي ٻڌايو ويندو.
سپريم ڪورٽ ۾ چيف جسٽس عمر عطا بنديال جي سربراهيءَ ۾ 6 رڪني بئنچ عام شهرين جي فوجي عدالتن ۾ ٽرائل خلاف درخواستن تي ٻڌڻي ڪئي.
ٻڌڻي دوران وڪيل فيصل صديقي دليل ڏيندي چيو ته فل ڪورٽ جوڙڻ سان بئنچ تي اعتراض به ختم ٿي ويندو، درخواست ۾ واضح لکيل آهي ته هن وقت فل ڪورٽ جوڙڻ سان ڪيس متاثر نه ٿيندو.
فيصل صديقي چيو ته اٽارني جنرل خاطري ڪرائي ته هن ڪيس دوران ڪنهن شهريءَ جو فوجي ٽرائل نه ٿيندو، ٽن ججن ڪيس ٻڌڻ کان معذرت ڪئي آهي، اهي فل ڪورٽ جو حصو نه ٿا بڻجي سگهن.
جسٽس يحيٰ آفريدي چيو ته ٽن ججن ڪيس ٻڌڻ کان معذرت ناهي ڪئي، موجوده ڪيس ۾ رڳو هڪ جج ڪيس ٻڌڻ کان معذرت ڪئي.
جسٽس مظاهر چيو ته اوهان هن وقت فل ڪورٽ جو مطالبو ڪري رهيا آهيو، جڏهن دليل مڪمل ٿي چڪا آهن.
چيف جسٽس چيو ته درخواست ڏيندڙن کان به فل ڪورٽ تي موقف ورتو وڃي.
درخواست ڏيندر اعتزاز احسن روسٽرم تي آيو ۽ چيو ته اهڙي قسم جي درخواستن جو دير سان اچڻ ڪيس جي مقصد کي خراب ڪرڻ برابر آهي، کيس هن بئنچ ۽ سپريم ڪورٽ تي مڪمل اعتماد آهي.
هن چيو ته هو مارشل لا ۾ به عدالتن ۾ پيش ٿيندو رهيو آهي، عدالت کي ڪيس جو ترت فيصلو ڪري تڪرارن جو رستو بند ڪرڻ گهرجي.
لطيف کوسا دليل ڏنا ته هو چاهن ٿا ته فل ڪورٽ ڪيس ٻـُـڌي پر اهو ٽيڪنيڪي بنيادن تي ممڪن ناهي، حڪومت طرفان ڪيس کي مذاق بڻايو ويو آهي، فل ڪورٽ جي درخواست رڳو وقت جو ذيان آهي.
سلمان اڪرم راجا چيو ته اهو بهترين موقعو آهي ته سپريم ڪورٽ فوجي عدالتن بابت هڪ ئي ڀيرو فيصلو ڪري ڇڏي، ملڪي تاريخ ۾ پهريون ڀيرو اختيار عدالت جي هٿ ۾ آهي.
سپريم ڪورٽ بار فل ڪورٽ بڻائڻ جي مخالفت ڪئي ۽ وڪيل عابد زبيري چيو ته بار کي به بئنچ تي مڪمل اعتماد آهي.
ٻڌڻي دوران فيصل صديقي ۽ زمان وردگ کانسواءِ سمورن درخواست ڏيندڙن فل ڪورٽ جي مخالفت ڪئي، جڏهن ته پي ٽي آءِ چيئرمين طرفان به فل ڪورٽ جي مخالفت ڪئي وئي.
