ميهڙ ڀرسان پوليس ۽ ڏوهارين ۾ فائرنگ جي ڏي وٺ دوران هڪ پوليس اهلڪار شهيد ۽ هڪ زخمي

ميهڙ ڀرسان پوليس ۽ ڏوهارين ۾ فائرنگ جي ڏي وٺ دوران هڪ پوليس اهلڪار شهيد ۽ هڪ زخمي ٿي پيو. پوليس موجب، ڏوهارين جي موجودگي جي اطلاع تي ون فائيل انچارچ سوڌل سولنگي جي اڳواڻي ۾ پوليس پهتي ته لڪي ويٺل ڏوهارين فائرنگ ڪري ڏني، جنهن سبب گوليون لڳڻ سبب جمعدار ذوالفقار علي ترڪ شهيد ٿي ويو. اطلاع ملڻ تي پوليس جي وڏي نفري ڏوهارين جو پيڇو ڪري شاخائي کوسا ۽ ڳوٺ خيرو ڀٽي تي چڙهائي جنهن دوران ڏوهارين ۽ پوليس ۾ مقابلو ٿي پيو. مقابلي دوران هڪ پوليس اهلڪار صدام حسين ڪلهوڙو گوليون لڳڻ سبب سخت زخمي ٿي پيو جنهن کي علاج لاءِ لاڙڪاڻي اسپتال نيو ويو. مليل ڄاڻ موجب پوليس اهلڪار کي شهيد ڪندڙ ڏوهارين جي سڃاڻپ کوسه برادري سان تعلق رکندڙ ٻن ڄڻن طور ٿي. جن جي ڳوٺ تي ايس ايس پي دادو جي حڪم تي مختلف ٿاڻن جي پوليس چڙهائي ڪري ڳوٺ جو گهيرو ڪري ورتو آهي.