ٺاروشاهه ويجهو پوليس ۽ ڏوهارين ۾ مقابلو، ايس آءِ سميت 3 اهلڪار زخمي

ٺاروشاهه ويجهو ڏوهارين جي گرفتاري لاءِ ڳوٺ تي چڙهائي ڪندڙ پوليس پارٽي تي هٿياربندن جي فائرنگ ۾ ٽي اهلڪار زخمي ٿي پيا. پوليس جو چوڻ آهي ته مڃٺ ڀرسان ڪچي واري علائقي ۾ مختلف ڪيسن ۾ گهربل منٺار ڀرٽ، دلدار ڀرٽ، لکمير ڀرٽ ۽ حميد ڀرٽ جي گهرن تي  چڙهائي ڪئي ته هٿياربند فائرنگ ڪري ڏني. پوليس جو چوڻ آهي ته فائرنگ جي ڏي وٺ دوران سب انسپيڪٽر غفور نائچ، اهلڪار غلام مصطفيٰ ڪلهوڙو ۽ شاهد سيال زخمي ٿي پيا، جن کي طبي امداد لاءِ اسپتال منتقل ڪيو ويو آهي. پوليس ۽ ڏوهارين وچ ۾ فائرنگ جي ڏي وٺ جو سلسلو جاري آهي، وڌيڪ پوليس نفري پڻ طلب ڪئي وئي آهي.