ڪي اليڪٽرڪ جي سي اي او کي سنڌ هائيڪورٽ مان وڏو رليف ملي ويو

ڪي اليڪٽرڪ جي سي اي او کي سنڌ هائيڪورٽ مان وڌيڪ رليف ملي ويو، عدالت مونس علوي کي هٽائڻ  بابت منع نامي ۾ 12 سيپٽمبر تائين واڌ ڪري ڇڏي. جسٽس محمد اقبال ڪلهوڙي جي سربراهيءَ ۾ 2 رڪني بينچ ۾ ڪي اليڪٽرڪ جي سي اي او کي عهدي تان هٽائڻ واري صوبائي محتسب اعليٰ جي فيصلي خلاف درخواست جي ٻڌڻي ٿي. مونس علوي پنهنجي وڪيل بئريسٽر عابد زبيري سان گڏ عدالت ۾ پيش ٿيو. صوبائي محتسب اعليٰ ۽ متاثر عورت لکت ۾ جواب جمع ڪرائي ڇڏيا. وڪيل عابد زبيري چيو ته مونس علوي ڏنڊ جا 25 لک رپيا سنڌ هائيڪورٽ جي اڪائونٽ ۾ جمع ڪرائي ڇڏيا آهن. متاثر عورت جي وڪيل چيو ته مونس علوي سنڌ جي گورنر ڪامران ٽسوري وٽ سندس خلاف اپيل به داخل ڪئي. جسٽس اقبال احمد ڪلهوڙي ريمارڪس ڏنا ته ٺيڪ آهي، هو درخواست کي اڪلائيندا، گورنر درخواست تي پنهنجو فيصلو ڏئي. درخواست ڏيندڙ عورت جي وڪيل چيو ته هي درخواست ٻڌڻ جوڳي ناهي. صوبائي محتسب جي وڪيل بئرسٽر ايان چيو ته گورنر کي ٻڌڻي کان روڪيو وڃي، هي هڪ اڳوڻو سيشن جج آهي، هن بيان رڪارڊ ڪيا هئا، هو هتي ڪيئن پيش ٿي سگهي ٿو؟. جسٽس اقبال ڪلهوڙي پڇاڻو ڪيو ته ڇا توهان ثبوت رڪارڊ ڪيا آهن ؟، سنڌ جو گورنر اپيل ٻڌي سگهي ٿو، هو کيس ڇو روڪن؟. عدالت جمع ڪرايل جواب تي جواب طلب ڪري ورتو. عدالت مونس علوي کي هٽائڻ  بابت منع نامي ۾ 12 سيپٽمبر تائين واڌ ڪندي ٻڌڻي ملتوي ڪري ڇڏي……..