بچاءَ واري وزير خواجه آصف چيو آهي ته افغان طالبان ڀارتي مفادن لاءِ ڪم ڪري رهيا آهن، جنگبندي جي ڀڃڪڙي تي ڀرپور جواب ڏنو ويندو، طالبان جا فيصلا ۽ ڪارروايون ڀارت مان اسپانسر ٿي رهيون آهن، ڪابل حڪومت دهلي جي پراڪسي جنگ وڙهي رهي آهي، طالبان جي نيت امن قائم ڪرڻ جي نه پر تڪرار کي هٿي ڏيڻ جي آهي.
خانگي ٽي وي سان ڳالهائيندي خواجا آصف الزام هڻندي چيو ته افغانستان هن وقت ڀارت جي پراڪسي جنگ وڙهي رهيو آهي، جهنڊي تي ڪلمه طيب لکيل آهي ۽ هو هن وقت ڀارت جا اوزار بڻيل آهن.
سندس چوڻ هو ته موجوده صورتحال ۾ افغان طالبان اصل ۾ ڀارت جي مفادن لاءِ ڪم ڪري رهيا آهن، جنگبندي جي ڀڃڪڙي ڪئي وئي ته ڀرپور جواب ملندو.
بچاءَ واري وزير چيو ته جيڪڏهن افغانستان طرفان جنگبندي جي ڀڃڪڙي جاري آهي ته پاڪستان کي به جواب ڏيڻو پوندو ۽ اهو هن اختيار کي استعمال ڪندو.
خواجا آصف چيو ته 48ڪلاڪن جي جنگبندي آهي پر ڀڃڪڙي ٿي ته ردعمل ايندو، طالبان جا فيصلا ۽ ڪارروايون ڀارت مان اسپانسر ٿي رهيون آهن.
هن چيو ته طالبان جي نيت امن قائم ڪرڻ جي نه پر تڪرار کي هٿي ڏيڻ جي آهي، طالبان جيڪا ٽينڪا ڏيکاري رهيا آهن اها پاڪستان وٽ ناهي، خبر ناهي ڪهڙي ڪٻاڙي کان ٽينڪ حاصل ڪئي وئي آهي.
