حيدرآباد جي لطيف آباد واري علائقي ۾ ٻن ڌرين ۾ جھيڙي دوران علائقو جنگ جو ميدان بڻجي ويو

حيدرآباد جي لطيف آباد واري علائقي ۾ ٻن ڌرين ۾ جھيڙي دوران علائقو جنگ جو ميدان بڻجي ويو، پوليس جي وڏي نفري پهچي جهيڙو ٽاري ٻن زخمين کي اسپتال منتقل ڪيو. ايس ايس پي حيدرآباد ڊاڪٽر فرخ لنجار جو چوڻ آهي ته ٻن ڌرين ۾ ذاتي مسئلي سبب جهيڙو ٿيو، فائرنگ ۽ ڀڃ ڊاهه سبب علائقي ۾ خوف پکڙجي ويو. ايس ايس پي موجب، پوليس جي وڏي نفري جهيڙي واري هنڌ پهچي جهيڙو روڪرائڻ لاءِ لٺبازي ڪئي، جنهن بعد ٻن زخمي کي اسپتال منتقل ڪيو ويو. ايس ايس پي ٻڌايو ته پوليس جي وڏي نفري واقعي واري هنڌ موجود آهي جڏهن ته صورتحال پڻ ڪنٽرول ۾ آهي. ايس ايس پي جو وڌيڪ چوڻ هو ته ڪنهن کي به قانون هٿ ۾ کڻڻ جي اجازت نه ڏني ويندي، امن امان خراب ڪندڙن خلاف سخت ڪارروائي ڪئي ويندي.